12 kilos lang ang timbang sa costume sa festival queen–Kapitolyo

CEBU, Philippines — Gipaubos sa pre-judging ang 47 ka Pasigarbo sa Sugbo Queens diin ang kalihokan gipahigayon niadtong Domingo diha sa Capitol Social Hall.

Ang maong festival queens nipasigarbo sa ilang mga costume nga gidensyo pagpakita sa tagsa-tagsa ka festival sa contingent nga ilang girepresentahan.

Ang Kapitolyo nilatid sa rekisitos nga kinahanglang 12 kilos lang ang timbang sa mga costume ug props sa festival queens.

Atol sa pictorial ug pre-judging pipila sa mga festival queen uban sa ilang mga designer ang nihulip sa mga materiyales gikan sa metal ngadto sa indigenous sama sa mga bamboo ug foam.

Gihimo kini nga rekisitios sa Kapitolyo aron nga luwas ug komportable ang festival queen sa ilang pagsayaw.

Ang awards sa festival queen mao ang Best in Festival Queen Costume diin i-award kini sa designer, Miss Photogenic ug ang korona sa Festival Queen 2024.

Nunot niini, giklaro sa kagamhanan sa Dakbayan sa Sugbo nga magsilbi lang nga host ang siyudad alang sa Pasigarbo sa Sugbo 2024 ug walay budgetary disbursements gawas sa gitanyag nga mga serbisyo.

Matud ni Acting Cebu City Mayor Raymond Alvin Garcia nga andam na ang Cebu City Sports Center isip venue sa ipahigayon nga Pasigarbo sa Sugbo.

Nasayran nga si Garcia mopahigayon og inspection sa lugar karong semanaha aron masiguro nga kompleto na ang tanan sa dili pa ang dakong kasaulogan.

Si Garcia kampante nga magmalampuson ang pagpahigayon s Pasigarbo sa Sugbo karong tuiga human nga nasinati na sa siyudad ang pag-host og dakong kalihokan sama sa Palarong Pambansa niining ulahi lang.

“In fact sa Palaro, one school (nagpapuyo og) 1,000 athletes. Kini (Pasigarbo) maximum of 250 ra per school, so it’s more manageable for us since this is only three days so of course preparations are already underway”, padayag ni Garcia.

Giklaro ni Garcia nga magsilbi isip host ang Dakbayan sa Sugbo ug walay pundo nga ipagawas nga motabang sa mga gastohan sa probinsiya atol sa kasaulogan.

Apan ang siyudad mohatag sa serbisyo sama sa mga trabahador ug maintenance sa mga billeting quarter alang sa mga contingents.

Dugang serbisyo naglakip sa paghatag og tubig ug kuryente ug ang pagpakatap og traffic enforcers ug security personnel. Preciosa L. Bacalso, Rowena D. Capistrano (BANAT NEWS)