Pinansiyal nga ayuda sa senior citizen ihatag sa Septiyembre

CEBU, Philippines — Si Acting Cebu City Mayor Raymond Alvin Garcia atol sa gipahigayong press conference kagahapon sa buntag nipahibalo sa pagpanghatag na sa pinansiyal nga ayuda sa senior citizens karong Septiyembre 7, 2024.

Matud ni Garcia nga sukad sa iyang paglingkod isip acting mayor sa siyudad maoy iyang gipaniguro nga mahatag dayon ang financial assistance sa mga senior citizen matag unang semana sa kataposan nga buwan matag quarter.

Gipadayag ni Garcia nga mosunod usab dayon ang financial assistance sa mga person with disabilities human sa pagpanghatag sa ayuda sa senior citizens.

Ug maoy iyang tinguha nga aksyon dayon sa tanang mga trabahuon sa siyudad alang sa kaayohan sa tanang Sugboanon.

Ang mga senior citizen sa siyudad makadawat ug tag P3 mil matag quarter og tag P1,000 matag buwan.

Nasayran nga niabot ngadto sa 90 mil ang gidaghanon sa mga senior citizen nga makadawat sa ilang financial assistance sa Siyudad sa Sugbo. (BANAT NEWS)