633 depektoso ug tikasang timbangan gipangguba

CEBU, Philippines — Mga depektosong 633 ka timbangan nga nasakmit sa City Market Operations Division sa mga merkado sa Dakbayan sa Sugbo gipangguba sa atubangan mismo ni acting Mayor Raymond Alvin Garcia human sa flag raising ceremony atubangan sa Cebu City Hall kagahapon sa buntag.

Matud pa ni Garcia, angay panggub-on gayud ang mga depektoso nga timbangan aron dili kini magamit og mapahimuslan.

Dugang pa ni Garcia padayon gihapon ang operasyon batok sa mga dautan nga timbangan aron mahunong na kining pagpanikas sa mga vendors ngadto sa mga tawo.

Si Robert Barquilla, ang pangulo Cebu City Markets Operation Division (MOD), nibutyag ang maong mga timbangan nasakmit kini sukad niadtong tuig 2022 hangtud niadtong hulyo 2024.

Dugang pa ni Barquilla ang maong mga timbangan nasakmit gikan sa napulo ka mga public markets sa siyudad ug mga barangay satellite markets nga surpresa nilang giinspeksyon.

Gitug-an ni Barquilla nga padayon ang ilang operasyon matag karon ug unya batok sa mga gubaon ug tikasan nga timbangan. (BANAT NEWS)