SACLEO sa LCPO kapin usa ka kilong shabu nasakmit

CEBU, Philippines — Nasakmit sa kapolisan sa Lapu-Lapu City Police Office (LCPO) ang 1,087.82 gramo nga shabu nga nagkantidad og P7, 397,176.00 gikan sa napulo ka mga drug pushers nga ilang nadakpan sa usa  ka semana nga Simultaneous Anti- Criminality  Law Enforcement Operation (SACLEO) nga nagsugod niadtong Agosto 12 hangtod sa Agosto 18, 2024.

Si  Police  Colonel  Ali Baron, director  sa LCPO miingon  nga ang pagkaskmit sa maong shabu ug ang pagkasikop sa mga pushers resulta sa walay hunong nilang operasyon sa pagsumpo sa maong ilegal nga kalihokan sa maong dakbayan.

Gihingusgan sab mao ang pagpakgang sa ilegal  nga sugal nga naglakip sa ilegal  nga suwertres, hantak, tong-its, tigbakay nga miresulta usab sa pagkasikop sa 20  ka mga sugarol ug nasakmit ang gambling paraphernalia ug ang salapi nga gipusta nga nagkantiad og P4,150.00

Laing gihingusgan mao ang paghipos sa mga armas  nga walay lisensiya ug usa ka tawo nga naghupot ang nadakpan ug gibalhog karon sulod sa holding facility sa LCPO. Samtang unom usab ka mga tawo ang boluntaryo nga mitahan sa ilang armas nga walay lisensiya ug 21 usab ang mitahan sa ilang armas nga wala na renew  ang lisensiya. (BANAT NEWS)