Papa sa mga batang napaig, namatay sab

CEBU, Philippines — Nakabsan gyud sa kinabuhi ang amahan sa duha ka batang nangamatay sa sunog samtang kini giatiman sa mga doktor sa tambalanan sa Tagbilaran City sumala pa sa kapolisan sa maong siyudad.

Ang namatay niadtong adlaw nga Sabado sa kaadlawon, Agosto 17,2024 mao si Edgardo Lasco, 54, kinsa nisuway unta sa pagsalbar sa iyang mga anak nga usa pa ka tuig ug 3-anyos sa dihang niulbo ang sunog sa ilang kamalig diha sa Purok 1, Barangay Manga, Tagbilaran City niadtong Huwebes sa gabii, Agosto 15, 2024.

Kahinumduman nga kritikal ang kahimtang sa amahan dihang gidala sa ospital gumikan sa mga paso nga naangkon sa tibuok lawas niini sa dihang iyang gisungasong ang nagdilaab nilang panimalay aron pagsalbar sa iyang mga anak.

Matud ni Police Lieutenant Colonel John Kareen Escober, hepe sa Tagbilaran City Police Station nga nakauli na ang asawa sa biktima nga nanarbaho sa kaulohan.

Gitabangan kini sa Local Government Unit sa Tagbiliran City aron mapadali ang pag uli niini ug makahatud sa lubong sa iyang mga anak ug bana.

Padayon pa ang imbestigasyon sa kabomberohan kun unsa gyud ang hinungdan sa sunog nga gasugod sa panimalay sa mga biktima. (BANAT NEWS)