Lalaki nag-spiderman nadakpan

CEBU, Philippines — Nabulabog ang malinawon nga pagkatulog sa mga residente sa Sitio San Juan, Barangay Sambag 2, siyudad sa Sugbu kagahapon sa kaadlawon human usa ka kalake ang nagdagan-dagan sa atop ug nisulod pa gyud og balay sa wala pa nikatkat sa ponuan sa kahoy.

Ang maong lalake mao si Bryan Saymorin Pogoy, 30 anyos, residente sa Looc, Lungsod sa Asturias. Sa impormasyon sa Police Station 2 sa Cebu City Police Office(CCPO) nga ang suspetsado dunay barkada nga gikan matud pa sa Mindanao.

Giingong nagplano ang grupo nga mangawat og motor apan nakabantay matud pa siya hinungdan nga nieskapo kay basin maangin sa buhaton sa iyahang barkada.

Nidagan matud pa ang suspek kay nagtuo siya nga gigukod siya sa iyahang mga barkada maong nidagan kini agi sa mga atop sa mga balay. 

Hangtod naabot ang suspect sa balay ni alyas Japet ug didto nisulod aron unta motago apan nakamata gikan sa pagkatulog ang tagbalay kay nisinggit ang mga anak niini.

Nakuptan ang suspek apan mikisi-kisi maong nakaikyas ug nikatkat sa punoan sa Gemelina diin siya gipaabot sa mga polis nga mokanaog. Pag-alas 5:30 sa buntag nikanaog kini tungod sa hangyo sa kapulisan.

Kasong trespass to dwelling by virtue of citizens arrest ang ipasaka batok kaniya.

Samtang gisusi pa sa kapolisan kun unsa ka tinuod ang gipangangkon niini bahin sa iyang mga amigo nga taga Mindanao. (BANAT NEWS)