MOA alang sa de kalidad nga healthcare services sa Mandaue

CEBU, Philippines — Nagpirmahanay og Memorandom of Agreement (MOA) ang Kagamhanan sa Siyudad sa Mandaue pinaagi ni Mandaue City Mayor Jonas Cortes ug ang kadagkuan sa Maayo Medical Clinic Corporation nga gipangulohan sa ilang Medical Director, Dr. Lawrence Chad Liu.

Kini aron mag-alayon ang siyudad ug ang Maayo Hospital sa paghatag og dekalidad nga Healthcare services sa mga Mandauehanon.

Ang Kagamhanan sa Mandaue maoy moabaga sa gastohan sa mga pasyente nga Mandauehanon nga maserbisyohan sa Maayo Hospital diin naglakip niini kadtong magpa-admit, emergency services, laboratory, diagnostic ug uban pa.

Mogahin ang siyudad og P700 mil matag buwan nga pundo sa Maayo Hotel ug plano ni Mayor Cortes nga padak-an kini sunod tuig.

Si Mayor Cortes miingon nga una lang ang Maayo Hospital nga pribadong tambalanan nga partner sa siyudad apan makigsabot usab ang siyudad sa ubang ospital aron mapalapdan ang serbisyo medikal alang sa mga molopyo.

"Eversince, priority gyud sa akong administration ang health services kay importante kaayo ni sa katawhan. Sayud ta nga daghan sa atong constituents nga dili ka afford sa hospital, " nagkanayon si Mayor Cortes.

Gipalapdan na usab sa mayor ang Mandaue City Hospital ug dugangan og mga gamit aron maatiman ang mga pasiyente nga Mandauehanon nga modangop niini.

Dugang sa mayor nga iyang nang gipadak-an ug gipalapdan ang serbisyo sa ospital nga anaa sa Mandaue.

Usa niini ang Eversly Child Sanitarium and General Hospital nga gigahinan og pundo niadtong napili siya nga kongresista sa ikaunom nga distrito sa lalawigan sa Sugbo. (CEBU NEWS)