Gibawsan nakalingkawas

CEBU, Philippines — Nalandig sa tambalanan ang usa ka ex-convict human kini gipusil sa kabanay sa matud pa napatay niini kaniadto samtang ang biktima nangape diha sa Sitio Zapanta, Barangay Tejero, siyudad sa Sugbo kagahapon sa alas 4 sa kaadlawon.

Ang biktima mao si Mark Anthony Gikain Rico, 44, nagpuyo sa Sitio Riverside, Barangay Tejero ning siyudad.

Sa report sa Waterfront Police Station 3 sa Cebu City Police Office(CCPO) nga nakadawat sila og tawag labot sa nahitabong pagpamusil sa dapit ug ilaha kining girespondehan.

Nasuta ang biktima niadto sa dapit ug nangape uban iyahang hinigugma sa dihang kalit nga adunay lalaki nga nibutho ug walay daghang pangutana gidiretso siya pagpusil niini sa makadaghang higayon gamit ang kalibre .45 armas ug naigo kini sa wala nga aping.

Ang mamumuno daling misibat human mahimo ang krimen samtang ang biktima nagkadugo ug nagping-it sa kasakit ug daling gidala sa Vicente Sotto Memorial Medical Center sa iyahang mga kabanay.

Na recover sa kapulisan sa crime scene ang upat ka basiyo ug usa ka slug sa kalibre .45 nga armas. Nasayran ang biktima nakombikto sa kasong murder ug iyaha kining giserbisyohan sulod sa 10 ka tuig ug nakagawas niadto lang Oktobre 23, 2023.  Sa pakisusi sa kapulisan nailhan matud pa sa biktima ang nagpusil kaniya tungod kay namay-ungan niya ang dagway niini nga giingong paryente sa tawong iyahang napatay kaniadto.

Pagpanimawos karon ang motibo nga gisubay sa imbestigasyon sa kapolisan. Hinuon, wala gisalikway sa kapulisan ang posibilidad sa ubang motibo sa suway pagpatay kaniya.