Digital payments gilusad sa merkado sa siyudad sa Sugbo

CEBU, Philippines — Ang Cebu City Market mamahimo na nga mudawat og digital payments samtang ang mga market-goers makapamalit na bisan walay pisikal nga kwarta pinaagi niini. Ang inisyatiba nga gitawag og Paleng-QR campaign opisyal nga gilusad kagahapon, Agosto 15, 2024, sa interim building sa Carbon Public Market.

Giingon nga ang Paleng-QR PH nagtumong sa pagdasig sa mga cashless payments isip usa ka "convenient alternative” sa pagpalit og mga goods sa mga publikong merkado ug alang sa pagbayad sa pletehan sa mga pampublikong sakyanan.

Gawas niini, nagtinguha usab kini nga mapausbaw ang digital payments ecosystem sa Pilipinas pinaagi sa pagpasiugda og cashless transactions sa mga publikong merkado ug lokal nga transportasyon, partikular na sa mga traysikol.

Sa iyang pamahayag, si Acting Cebu City Mayor Raymond Alvin Garcia miingon nga ang maong sistema sa pagbayad sa mga publikong merkado sa dakbayan usa ka testamento sa kausaban ug nagtimaan sa usa ka mahinungdanon nga lakang padulong sa usa ka mas konektado ug efficient nga dakbayan.

Siya nagpasalamat sa Bangko Sentral ng Pilipinas ug sa Department of Interior and Local Government (DILG) sa pagpanguna ug pagpalambo sa maong mga proyekto.

Siya midugang, nga ang pagpasiugda sa cashless nga pagbayad sa mga merkado ug lokal nga transportasyon, nagpalapad sa foundation alang sa usa ka mas dali ug sayon nga paagi sa negosyo nga makabenepisyo sa mga konsumidor ug small business owners.

Dugang pa niya ang paghangop sa cashless payments dili lang trend apan usa ka kinahanglanon sa global economy. Siya midugang, nga kini makapauswag sa economical stability, makapamenos sa risgo sa pagdumala sa kwarta, ug naghatag of seguridad.

Ang maong programa repleksyon usab sa pagduso sa dakbayan ngadto sa kabag-ohan ug kauswagan. (BANAT NEWS)