DBM: COS ug JO ipauna sa plantilla position sa gobiyerno

CEBU, Philippines — Giawhag ni Department of Budget and Management (DBM) Secretary Amenah Pangandaman ang mga kadagkoan sa mga ahensiya nga unahon ang contract of service (COS) ug job order (JO) nga mga trabahante sa pagpuno sa ilang tagsa-tagsa ka mga bakanteng plantilla position sa gobiyerno. Atol sa gipahigayong press briefing si Pangandaman nagkanayon nga sa kinatibuk-ang 2,017,380 ka plantilla positions sa nasudnong kagamhanan, 92 porsyento ang napuno samtang ang nahibilin nga walo ka porsyento o 168,719 ka posisyon ang nagpabiling wala mapuno.

Nunot niini, gitumbok ni Pangandaman ang bag-ong giluwatan sa Commission on Audit (COA)-DBM Joint Circular No. 2, series of 2024 nga naghatag og extension sa transition period sa pakiglambigit sa mga trabahante sa COS ug JO sa gobiyerno hangtud sa Disyembre 31, 2025 diin mapupos ang ilang kontrata.

Ang maong circular nagtugot sa mga departamento ug ahensiya sa pag-hire og bag-ong mga trabahante sa COS/JO pinaagi sa indibidwal nga mga kontrata ug pag-renew sa mga kontrata sa ilang kasamtangang COS/JO hangtud sa kataposan sa 2025.

Nagkanayon si Pangandaman nga kinahanglan kini aron dili sila mawad-an og trabaho ug sa samang higayon madugangan pa ang ilang kasinatian sa trabaho ug edukasyon aron makasulod sila sa bakanteng mga posisyon sa nasudnong pangagamhanan.

Sayo pa, si Presidente Ferdinand “Bongbong” Marcos, Jr. nimando sa mga ahensiya sa gobiyerno sa pagpatuman og mga estratihiya aron matabangan ang mga trabahante sa COS ug JO sa pag-qualify sa mga permamenteng tahas.

Ang mga estratehiya nga gikonsiderar naglakip sa pagpatuman sa mga review sessions aron matabangan sila nga makapasar sa Civil Service Examination ug paghatag og pagbansay pinaagi sa pag-edukar, pag-usab ug pagbansay nila aron mapalambo ang ilang mga kahanas ug kwalipikasyon. (BANAT NEWS)