Bomb threat sa UC padayong giimbestigar sa kapolisan

CEBU, Philippines — Padayon ang imbestigasyon sa Cebu City Police Office kalabot sa bomb threat sa University of Cebu-Banilad Campus kini bisan pa og deleted na ang post diha sa Facebook.

Matud ni Police Lieutenant Colonel Janette Rafter, deputy city director for administration sa CCPO nga ang Regional Anti-Cybercrime Unit (RACU)-7 nisubay na aron mailhan ang nagpaluyo sa maong post nga nakabalda sa klase sa maong campus.

Bisan og prank o kaha binuang lang ang maong post apan dili nila kini ipakagamay hinungdan nga girespondehan nila kini ug nihimo og paneling sa lugar.

Nasayran nga nilanat og pila ka oras una nadeklara nga cleared ang tunghaan tungod kay tanang suok sa building gisusi kini.  Ang kapolisan sa siyudad hugot nga nakig-alayon sa mga tunghaan diin naghimo sila og information dissemination sa angayang buhaton sa samang sitwasyon.

Ang kapolisan niawhag sa publiko kong ugaling adunay gihambin nga problema modangop ngadto sa kasaligang tawon aron mapadayag ang ilang gibati o modangop sa kapolisan ug ilang gipasalig nga dili nila ibutyag ang identity niini. —  BDB BANAT NEWS