P6.8 milyon kantidad sa shabu nasakmit gikan sa HVI

CEBU, Philippines — Niabot nagdto sa 1,003 ka gramong shabu nga nagkantidad og P6, 820,400 ang nasakmit atol sa buy-bust operation sa Lapu-Lapu City Police Office gikan sa usa ka high value individual nga pusher nga taga Barangay Kamuthaw, Siyudad sa Sugbo niadtong Martes sa gabii diha sa  Barangay Pusok, Siyudad sa Lapu-Lapu.

Si Police Colonel Ali Baron, direktor sa LCPO niila sa suspetsado nga si alyas "AJ",  26-anyos.

Nasakmit sa kapolisan gikan sa suspetsado ang 31 ka paketeng shabu nga giputos sa transparent nga plastik nga gisulod back pack niini.

Sa laing bahin, dul-an sa P8 milyones nga balor sa ilegal nga drugas ang nasakmit sa usa ka adlaw nga operation sa kapolisan sa Central Visayas gikan Agosto 13 ngadto sa 14, 2024.

Ang kapolisan nakapahigayon og 32 ka operasyon batok sa ilegal nga drugas ug niabot ngadto sa 1,175.67 ka gramong shabu ang ilang nasakmit nga nikantidad tanan ngadto sa P7,999,556 ug 37 ka tawo ang nasikop.

Usa ka libo ka pinaugang dahon sa marijuana ang nakompiska nga niabalor tanan ngadto sa P120 mil.

Nunot niini, nikabat ngadto sa P3,500 nga pusta ang nasakmit atol sa 22 ka operasyon sa kapolisan batok sa ilegal nga sugal diin 26 ka tawo ang nasikop ug 22 niini ang napasakaan og kaso.

Sa loose firearms, walo ka operasyon ang napahigayon sa kapolisan diin diin siyam ka armas ang gitahan ug nakompiska ug duh aka tawo ang nasikop ug napasakaan og kaso.

Samtang sa wanted persons, niabot sa 29 ka tawo ang nadakpan walo niini ang most wanted person ug 21 ang other wanted persons.

Subay niini, dul-an sa P730 mil ang namulta sa 1,204 ka tawo nga nakalapas sa mga lokal nga ordinansa.

Sa laing bahin usab, natingkagol sa detention facility sa Labangon Police Station  sa Cebu City Police Office (CCPO) ang 27-anyos nga lalaki human kini gialarma nga armado ug nakuhaan og ginadiling drugas diha sa Barangay Labangon, Siyudad sa Sugbo.

Ang suspetsado mao si Anthony Razaga Diola, residente sa Barangay Basak San Nicolas niining siyudad giingong usa na street level individual.

Nasakmit gikan sa suspetsado ang kalibre .9mm nga pistola nga adunay tulo ka buhing bala ug ilegal nga drugas.

Si Police Major Eraño Regidor, hepe sa Labangon Police Station nibutyag nga nadakpan na kaniadto ang suspetsado sa kasong pagpangawat ug giingong nalambigit usab kini sa ginadiling drugas. —Rowena D. Capistrano ug Decemay P. Padilla/BDB BANAT NEWS