Picket rally himoon karon sa mga sakop sa Piston-Cebu

CEBU, Philippines — Mopahigayon og duha ka oras nga picket rally karong adlawa ang mga sakop sa Pagkakaisa ng mga Samahan ng Tsuper at Opereytor Nationwide (Piston)-Cebu.

Kini human gisalikway ni President Ferdinand “Bongbong” Marcos, Jr. ang Senate Resolution 1096 nga nagsuspenso sa pagpatuman sa Public Transport Modernization Program (PTMP) kanhi Public Utility Vehicle Modernization Program (PUVMP).

Suma pa ni PISTON-Cebu chairperson Greg Perez nga ang ilang himoon usa lang ka adlaw nga kalihukan dili sama sa buhaton sa ilang counterpart sa Metro Manila, nga molusad og three-day transport strike sugod karong adlawa August 14 hangtud sa 16.

 “Dili mi moapil sa ilang three days transport strike kay picket rally ra mi diri mga duha ka oras ra,” suma ni Perez.

Dugang pa niya nga mokabat sa 50 ka drivers ug small-time operators ang magtapok diha sa barangay Carreta ug magmartsa paingon sa regional office sa Land Transportation Franchising and Regulatory Board-7.

Si Perez miingon nga nadismaya sila nga gisalikway ni Marcos ang Senate Resolution diin ilang gitawag og fake ang transportation modernization program nga mosangpot lang gihapon sa pag phase-out sa traditional jeepneys.

Niadtong Hulyo 31, 22 ka senador ang nipirma Senate Resolution 1096, nga nag-awhag sa gobyerno nga temporaryong isuspenso ang implementasyon sa PTMP hangtud nga hingpit nga maatiman ang concerns sa mga jeepney drivers ug operators.

Ang Federation of Cebu Transport Cooperative and Allied Cooperative and Corporation, nga naglangkub sa 22 ka transport cooperatives ang nalipay sa desisyon ni President Marcos.

Samtang si LTFRB-7 regional director Eduardo Montealto, Jr. miingon nga ang modernization program magpadayon, gani ang Banawa Transport Cooperative (BANTRASCO), Cebu City nag-inagurar sa ilang dugang unom ka modern jeepney nga mag rota dinhi sa Cebu City.

Suma pa ni Montealto nga dunay dugang 13 ka modern jeepney ang inagurahan sunod buwan.

Sa pagkakaron matud pa ni Montealto duna nay 1,400 modern jeepneys ug 896 traditional jeepneys ang na consolidated na dinhi sa Cebu.

“Atong makita sa atong records nga majority na gyud sa atong mga jeepneys kay consolidated na gyud ang ilang mga franchise. Kaning mga nisupak, gamay ra gyud kaayo na sila,” suma pa ni Montealto. —The Freeman