DPWH nigahin og P2B alang sa mga proyekto pagmenos sa baha

CEBU, Philippines — Ang Department Public of Works and Highways (DPWH) nigahin og P2 bilyones pundo alang sa mga dagko nga infrastructure projects aron mamenosan ang pagbaha sa Dakbayan sa Sugbo.

Atol sa news forum kagahapon si Konsehal Jerry Guardo, chairman sa committee on infrastructure sa konseho sa siyudad nagkanayon nga ang maong kantidad alang sa Program of Works and Estimates (POWE) sa flood control projects sa siyudad sa tuig 2025.

Gawas niini, gihangyo usab nila ang Department of Interior and Local Government (DILG) nga mogahin og pundo sa maong mga infrastructure project ubos sa “Beyond Border” agreement.

“Especially Butuanon River kay naa man ni sa boundary of Cebu and Mandaue so dako-dako jud nga budget ang kinhanglan. We need a help from the national government”, matud ni Guardo. Ang Beyond Border usa kini ka collaborative river governance forum nga inisiyatibo kalabot sa pagsulbad sa pagbaha.

Matag Lunes, ang Task Force Gubat sa Baha (TFGsB) uban sa legislative ug executive representations nagpahigayon og sinemana nga mga meeting aron hingpit nga hisgutan ang mga programa sa pagpamenos sa baha.

Apil ang technical working group (TWG) nga naglangkub sa planning engineers gikan sa DEPW DPWH- Engineering Office ug sa rehiyonal nga buhatan niini.

“So (that) they can come up with a design and appropriate budget for the implementation of this flood control projects”, padayag ni Guardo.

Samtang nagpadayon ang mga paningkamot batok sa pagbaha, si Guardo nagkanayon usab nga sa ilang evaluation gikinahanglan ang pagbawi sa three-meter easements kilid sa Estero de Parian ug sa Lahug River aron mamenosan ang pagbaha sa siyudad nga masinati sa matag pagbunok sa ulan.

Sa pagkakaron, constricted ang suba tungod sa mga informal settler ug ubang mga establisamento. Hinuon iyang gipasalig nga ang Task Force Gubat sa Baha padayon ang agresibo nga pagpatuman ngadto sa mga three-meter easement violators. (BANAT NEWS)