Unom nadakpan sa drugbust

CEBU, Philippines — Nagtingkagol sa prisuhan sa Labangon Police Station 10 sa Cebu City Police Office(CCPO) ang usa ka bag-ong nailhan nga drug personality human nadakpan sa buy-bust operation sa A. Lopez Street, Barangay Labangon, siyudad sa Sugbo kagahapon sa kaadlawon.

Ang nasikop mao si Dennis Gorial Buenaventura alyas Dencio, 29, residente sa Mahayahay 1, Barangay Calamba, siyudad sa Sugbo.  Nakuhaan ang suspetsado og 10.25 grams sa gituohang shabu nga nagkantidad og dul-an P70,000.

Kagahapon sa hapon, usa ka nurse aid sab ang gidakop sa mga sakop sa PNP Drug Enforcement Group Special Operation Unit 7 ug nakuhaan og 60 gramong gituohang shabu nga mokantidad og P408 mil. Ang operasyon gihimo diha sa Ludo Cemetery sa Barangay Mabolo, Cebu City. 

Nadakpan sab sa  mga sakop sa City Intelligence Unit (CIU) sa Mandaue City Police Office  (MCPO) ang 30 anyos nga lalaki nga taga Sambag 2 sa Siyudad Sugbo ug nakuhaan kini og tulo ka gramong gidudahang shabu nga nagkantidad og P40 mil.

Sa pikas bahin, malampuson sab ang buy-bust operation sa Philippine Drug Enforcement Agency (PDEA) Bohol Provincial Office, Bohol Maritime Police ug Tagbilaran City Police Station diha sa Barangay Cogon, Tagbilaran City, sa Bohol ug  giguba sab nila ang drug den niadtong Lunes sa gabii.

Ang nadakpan mao ang drug den maintainer nga si Lyndon Oronan, 35, ug ang ig-agaw niini nga si Jason Oronan, 38, ug si Ronnel Marquez, 19 ,  nga naaktuhang nagsuyop  sa lugar.

Lima ka putos nga gituohang shabu nga nagkantidad og P102 mil, buy-bust money, cellphone ug nagkalain-laing drug paraphernalia ang nasakmit sa kapolisan. —Rowena Capistrano, Romeo Limpangog (BANAT NEWS)