Dunay kaso nga dakpunon, nisukol napatay sa mga polis

CEBU, Philippines — Patay ang usa ka lalake nga dunay kasong paghupot og armas sa dihang gikataho nga nakigpinusilay kini sa kapulisan nga mo-serve unta sa iyang warrant of arrest sa Barangay Bayong, Lungsod sa Balamban, Martes sa buntag, Agosto 13, 2024.  Samtang ang iyang ig-agaw nga wanted sab sa kapolisan nadakpan.

Ang namatay mao si Paulino Tribunalo Cordezar, residente sa maong lugar.  Si Cordezar dunay pending warrant of arrest sa kasong kalapasan sa Republic Act 10591 (Illegal possession of firearms) nga gi-issue sa Regional Trial Court Branch 29, Toledo City, nga dunay girekomendar nga piyansa P150 mil.

Apan sa pagabot  sa tracker team gikatahong giunhan sila pagpusil sa suspek hinungdan sa nahitabong pinusilay ug napatay kini.  Usa ka KG-9 submachine pistol ug duna kini mga magazines nga puno og 40 ka bala ang nakuha gikan niya.

Nadakpan sab iyang ig-agaw nga si Jovel Tribunalo Villegas, kay aduna sab kini

pending warrant of arrest sa kasong murder nga gi-issue sa Regional Trial Court Branch 29, Toledo City ug Regional Trial Court Branch 70, Lapu-Lapu City ug kasong frustrated murder sa Regional Trial Court Branch 72, Lapu-Lapu City.

Na-recover sa kapulisan gikan niya ang kalibre .45 pistol, magazine nga dunay tulo ka bala, 50 ka buok live ammunition, homemade handgun ug usa ka kilong pinauga nga Marijuana nga nagkantidad og P120 mil. (BANAT NEWS)