Plantasyon sa marijuana gilarot, otso mil punoan gidauban
![Plantasyon sa marijuana gilarot, otso mil punoan gidauban](https://media.philstar.com/photos/2024/08/12/1_2024-08-12_23-49-17.jpg)
CEBU, Philippines — Gibanabanang otso mil ka fully-grown marijuana nga tanom ang gilarot ug gisunog sa mga sakop sa Bayawan City Police Station ug First ug Second Provincial Mobile Force Company sa Negros Oriental Police Provincial Office(NOPPO) gikan sa Sitio Santol, Barangay Mandauao, Bayawan City, Negros Oriental niadtong Domingo sa gabii.
Gibana-bana nga mobalor og P1.6 million ang mga marijuana nga gipang-ibot ug gisunog. Nagbilin lang ang mga tropa og ebidensiya alang sa eksaminasyon aron gamiton sa pagpasaka og kaso.
Si Police Regional Office (PRO)-7 Brigadier General Anthony Aberin midayeg sa operating unit sa maong malampuson nga operasyon ug gihimug-atan niini ang importansiya sa comprehensibo ug focused intelligence monitoring.
"We are leaving no stone unturned to ensure that all those responsible are brought to justice under the law. Our dedication to serving and protecting the people of Central Visayas is unwavering and we remain steadfast in upholding the rule of law in the region", ni Aberin pa. Samtang ang mga operatiba sa Philippine Drug Enforcement Agency(PDEA)-7 ug Cebu City Police Office Station 10 malampuson sa ilang buy-bust operation sa Sitio Upper Bonbonan, Barangay Labangon, siyudad sa Sugbo niadtong Domingo sa gabii. Nasikop ang target nga drug den maintainer nga si Randy Superada alyas Waray, 40, habal-habal driver. Laing nadakpan mao ang tigbisitahan sa drug den nga sila si Joshua Ortega, 21, trabaho ug Jennifer Limjap, 44, nga usa ka caregiver.
Nasakmit sa maong operasyon ang pito ka putos nga gituohang shabu nga nitimbang og 11 gramos ug gibana-banang mobalor og P74, 800, mga drug paraphernalia, buy-bust money, ug P170 nga gituohang halin sa illegal nga drugas. Duha ka semana nga gipaubos sa case build up ang suspect human makadawat og impormasyon ang kapulisan nga nalambigit kini sa illegal nga kalihukan.
Nasuta nga maka dispose ang suspect og 10 gramos nga drugas kada semana ug bag-o sab kining sulbong nga drug personality. Kasong kalapasan sa Sections 5, 6, 7, 11 ug 12, Article II sa Republic Act 9165 ang kasong atubangon sa mga suspetsado. — Romeo D. Marantal, Romeo Limpangog (BANAT NEWS)
- Latest