Gikulata sa babayeng kapuyo

CEBU, Philippines — Usa ka 59-anyos nga lalaki ang midangop sa kapolisan sa Presinto 5 sa Lapu-Lapu City Police Office (LCPO) ug mireklamo nga dili  na gayod niya maagwanta pa ang pagpamun-og kaniya sa iyang 60-anyos nga kapuyo.

Si Osoy  (dili tinuod nga ngalan), nagpuyo sa Barangay Buaya sa dakbayan sa Lapu-Lapu, nagpa-blotter sa Pusok Police Station sa miaging Domingo sa gabii ug miasoy sa Desk Officer bahin sa pagpanagmal kaniya sa iyang kapuyo.

Matud niya nga lima ka tuig na sila nga nagtipon, wala sila'y anak apan ang iyang kapuyo adunay mga anak sa iyang kanhi bana.

Giangkon ni Osoy nga usa sa mga hinungdan sa ilang away mao ang iyang pagka palahubog.

Gani, diha pa'y higayon sa milabay'ng tuig nga nagisi ang iyang kilay dihang gipusposan siya niini og binugha. Karong bag-o, matud pa niya nga gihapak na pud siya og botelya diha sa iyang buko-buko.

Nasayran nga dili kini ang unang higayon nga kini nisumbong sa kapolisan, ug sa matag higayon gitambagan kini nga adto una moreklamo sa barangay aron sila husayon didto.

Sa matag husay sa barangay, kanunay matud pa niya pasayloon ang kapuyo.

Buot ni Osoy  nga aduna unta'y balaod nga makaprotiher kaniya ug manubag sa balaod kadtong mga babayeng pisikal nga manakit og mga bana.

Sa pagkakaron, ang Pilipinas adunay Republic Act 9262 o Anti-Violence Against Women and their Children Act of 2004 o VAWC law, apan gihimo kini ekslusibo lamang para sa kababayen-an ug ilang mga anak.

Ang mga bana nga kulatado sa mga asawa, pwedeng mosang-at og kaso ubos sa Revised Penal Code ug sa Family Code kun gusto niining masilotan ang niabusar kanila.

Sumala pa niya, sa pagsige niya og pasaylo sa kapuyo, naanad na hinuon kini nga managmal kaniya nga nahimo na niya karong problema.

Nagplano siya nga makigbuwag na lang sa kapuyo tungod kay dili na gayod niini maantos pa ang kanunay nga pagpangulata ngadto kaniya. (BANAT NEWS)