Kapin P28 milyones ang danyos sa tulo ka sunog

CEBU, Philippines — Duha ka sunog ang niulbo sa Dakbayan sa Sugbo kagahapon adlaw nga Lunes, samtang nagbilin sab og P28 milyones nga danyos ang pagkasunog sa usa ka bodega sa Barangay Bankal sa Lapu-Lapu City niadtong adlaw nga Domingo.

Ang unang sunog sa Cebu City miulbo sa may Singson Compound, Barangay Guadalupe nga naglambigit ug residential houses.  Nadawat sa kabomberohan ang alarma alas-12:11 ug na fire out us aka minuto sa dili pa mag ala-una sa hapon. Ang maong sunog giingong nagsugod sa gipuy-an ni Mark John Baculi.

Gibana-bana nga moabot ngadto sa P600 mil ang danyos, walay gikataho nga nakalas o naangol sa hitabo apan 14 ka mga panimalay ang apektado , ang 12 niini maoy hingpit nga naugdaw ug duha ang nakan-an sa kalayo.

Ang kabomberohan nga gipangulohan sa imbestigador Fire Officer 3 Fulbert Navarro, padayon pa nihimo sa imbestigasyon sa hinungdan sa pag-ulbo sa maong sunog.

Sa talaan sa Department of Social Welfare and Services dili mominos sa 15 ka panimalay ang naugdaw ug 25 ka pamilya ang apektado sa maong sunog.

Ang OIC sa DSWS Portia Basmayor nipahibalo nga nihatag na sila og food packs ngadto sa mga nasunogan.

Samtang laing sunog nga niulbo sa may Don Pedro Cui St. sa Barangay San Antonio ning Dakbayan sa Sugbo, diin usa ka apartment nga paabangan ug adunay tindahan ang niulbo. 

Atol ning pagsulat sa balita, padayon pa ang imbestigasyon sa kabomberohan sa hinungdan sa maong sunog.

Sa pikas bahin, P28  milyones nga kantidad ang gibiling danyos  sa nasunog nga bodega sa furniture sa Sitio Kulo, Barangay Pajac  sa Siyudad  sa Lapu-Lapu nga nahitabo alas 2:41  ang takna sa miaging Doming sa hapon  Agosto 11, 2024

Si  Fire  Inspector Diomed Alburo, ground commander  sa maong sunog nga nahitabo miingon nga ilang nakontrolar  ang kalayo alas 2:48 ug hingpit kining napawong alas 3:15 ang takna sa hapon sa maong adlaw. Dugang pa ni Alburo nga ang maong  nasunog nga bodega ang gipanag-iya ni Eric Mendoza

apan kasamtagan kining giukopar ni  Jay Cris Caballes

Si  Alburo  miingon nga atol  sa pag-ulbo  sa kalayo walay gikatahong naanol o kinabuhing nakalas samtang padayon pa ang ilang imbestigasyon. (BANAT NEWS)