Cash grants sa 4Ps beneficiaries ma-disburse na sa DSWD
CEBU, Philippines — Mahimo nang maka-disburse ang Department of Social Welfare and Development (DSWD) og cash grants sa kapin 700,000 ka na reinstate nga beneficiaries sa 4Ps human nga nipagawas ang Department of Budget and Management (DBM) og P5 billion fund program.
Si DSWD Assistant Secretary ug Spokesperson Irene Dumlao nagkanayon nga ang DSWD nihangyo og dugang budget alang sa mga beneficiary sa 4Ps sa niaging tuig diin ang ilang grants temporaryong gi-hold tungod sa household reassessment.
Dihang nigawas ang Listahan 3 niadtong 2022 nakadawat ang ahensiya og daghang hangyo alang sa reconsideration nga nag-awhag sa pagpahigayon og revalidation gamit ang Social Welfare and Development Indicator (SWDI) Tool.
Samtang nag-revalidation, nakita nila nga daghang beneficiaries nga giisip na nga dili kabus ang naapektohan sa pandemiya ug daghan gihapon ang kinahanglang magpabilin sa programa tungod kay napektohan ang ilang lebel sa ilang kaayohan.
Matud sa tipamaba sa DSWD nga ang dugang pundo kasagarang naglangkub sa education grants alang sa mga reinstated household ug ang mga grants mahimong retroactive gikan sa buwan sa Enero hangtud sa Disyembre 2023.
Matag usa sa mga beneficiary makadawat og retroactive grants nga magdepende sa gidaghanon sa ilang mga anak nga gi-monitor sa programa nga anaa sa elementarya, junior high school o senior high school.
Human gi-release ang pundo gibuhat na ang payroll sa mga beneficiary ug gikatakda sila nga makadawat sa ilang grants sulod niining bulana. — /BDB (BANAT NEWS)
- Latest
