Dul-an P2 milyones nga shabu nasakmit
CEBU, Philippines — Nasakmit sa mga operatiba sa Provincial Intelligence Unit(PIU) sa Cebu Police Provincial Office(CPPO) ang mga pinakete sa gituohang shabu atol sa buy-bust operation sa Purok Guyabano, Barangay San Roque, dakbayan sa Talisay niadtong Sabado sa hapon.
Nadakpan sa maong operasyon ang High Value Individual nga si Giovanni Culanag Gomez, 38, taga Sitio Laray sa nahisgutang barangay. Nakuhaan ang suspetsado og 150 grams sa gituohang shabu nga nagkantidad og kapin P1 million.
Gikatahong gipanid-an siya sud sa usa ka semana sa dihang dunay nakatug-an sa kapolisan nga namaligya kini og ilegal nga drugas.
Nahibaw-an ang suspek matod pa maka dispose og usa ka kilong illegal nga drugas kada semana ug dili lang Talisay City ang area of distribution niini apan apil na ang ubang lugar sa South area.
Samtang usa ka e-bike drayber ang gidakop human kini nakuhaan og drugas diha sa Purok Riverside 1, Barangay Cansojong sa mao gihapong dakbayan niadtong Sabado sa kaadlawon. Ang dinakpan nailhan nga si Jason Gallines, 43, taga sitio Kimba, Barangay Cansojong sa nahisgutang siyudad.
Si Police Lt. Col. Epream Paguyod, hepe sa kapolisan sa Talisay miingong nga dunay nakasumbong kanila nga namaligya kini og drugas sa maong dapit hinungdan nga ilang gipanid-an ug gilusad ang operasyon dihang nakompirmar ang impormasyon.
Nakuhaan ang suspek og 15 gramos nga gituohang shabu nga gibana-banang balor nga P102 mil.
Gikan Agusto 10 hangtud kagahapong adlawa, Agusto 11, 2024 moabo 33 ka operasyon batok illegal nga drugas ang gihimo sa Police Regional Office(PRO)-7 sa tibuok Central Visayas nga niresulta sa pagkasikop sa 38 ka drug suspects. — Gabriel Bonjoc/IBM (BANAT NEWS)
- Latest
