Mountain biker nadagit patay

CEBU, Philippines — Patay ang usa ka 23-anyos nga batan-ong lalake human kini nadagit sa Hi-Ace Van samtang kini nagmaneho sa iyang mountain bike diha sa National Highway, sa Barangay Tinaan, sa siyudad sa Naga, pasado alas 5 sa hapon niadtong Sabado, Agosto 10, 2024.

Ang biktima nga 23-anyos residente sa Sitio Silangan 1, Barangay Tinago, siyudad sa Sugbo samtang ang driver sa Hi-Ace Van mao si alya Rody.

Sa imbestigasyon sa kapuisan sa dakbayan sa Naga, ang biktima ug ang drayber parehong padung sa Cebu City.

Apan pag-abot matud pa sa nahisgutang dapit giingong nadagit sa maong van ang mountain bike sa biktima hinungdan nga nalamba kini ug nakaangkon og grabeng kadaot sa kalawasan.

Daling gidala sa responders sa City Disaster Risk Reduction and Management Office (CDRRMO) ang biktima sa infirmary emergency sa dakbayan sa Naga apan gideklarar kining dead-on-arrival.

Ang driver sa Hi-Ace Van gikustodiya karon sa kapulisan ug gikatakda kining pasakaan og kasong Reckless Imprudence Resulting to Homicide. — /IBM (BANAT NEWS)