Paggamit sa basura nga plastic sa paghimo og karsada giaprobahan

CEBU, Philippines — Giaprobahan na sa Department of Public Works and Highways (DPWH) ang paggamit sa mga basurang plastic bag sa paghimo og mga dalan aron molungtad og dugay ang mga aspaltado nga karsada.

Si DPWH Secretary Manuel M. Bonoan niisyu og direktiba sa tanang regional offices, district engineering offices ug lain-laing cluster sa Unified Project Management Office nga mahimo nang mogamit sa mga ginunting nga mga basurang plastic bag aron isagol sa aspalto sa paggama og mga nasudnong dalan sa tibuok nasud.

Bag-ohay lang gipirmahan ni Bonoan ang Department Order No. 139, series of 2024, nga naglatid sa standard specification sa departamento alang sa paggamit sa recycled material nga gitawag og Item 310 (15) - bituminous concrete surface course nga adunay low-density polyethylene (LDPE) plastic bag waste.

Ang paggamit sa LDPE plastic bag nga mga basura sa asphalt cement mix malampuson nga nakapasar sa testing ug nakab-ot ang mga sumbanan nga gitakda sa DPWH Bureau of Research and Standards.

Matud ni Secretary Bonoan, ang bag-ong polisiya nagtinguha sa pagdasig sa pag-recycle sa LDPE plastic bag nga basura pinaagi sa paggisi niini ug paggamit niini isip additive aron maminusan ang posibilidad sa permanenteng deformation sa bituminous concrete o asphalt concrete surfaces.

Dugang niya nga kining kalamboan subay sa padayong paningkamot sa departamento sa pagsuporta ug pag-upgrade sa teknolohiya sa konstruksyon pinaagi sa pagsagop sa malampusong mga pagtuon ug panukiduki. — /MEL (BANAT NEWS)