DOTr: Modernisasyon sa jeepneys dili dinalian

CEBU, Philippines — Giklaro sa Department of Transportation (DOTr) nga dili dayon i-phase out ang mga tradisyonal nga jeepney hangtud mahuman ang Local Public Transport Route Plans (LPTRPs).

Si Transportation Secretary Jaime J. Bautista miingon nga ang sektor sa transportasyon ingon man mga magbabalaod miklaro nga walay kamandoang gipagawas nga dihadiha ang pag-phase out sa tradisyonal nga mga jeepneys.

Kini tungod  kay ang Public Transport Modernization Program (PTMP) pagahimoon subay sa mga hugna.

Gipasabot niya nga ang konsolidasyon sa mga operators ug drayber sa PUV maoy unang component sa PMTP ug ikaduha ang route rationalization nga ipadayon na sa DOTr, human nipadayag si Presidente Ferdinand Marcos Jr. og suporta niini.

Busa ang ahensya nakig-alayon sa mga lokal nga gobyerno aron mas dali mahuman ang route rationalization.

Sa ikatulong component o sa aktuwal nga modernisasyon dili pa kinahanglanon ang pagpalit og bag-ong mga modelo sa jeepney hangtud maplantsa ang LPTRPs.

Samtang ang Federation of Cebu Transport Cooperatives (FCTC) niawhag sa kagamhanan sa paggukod sa mga operator sa mga tradisyunal nga jeepneys nga patagong nigamit og dili awtorisadong prangkisa.

Matud ni FCTC chairperson Ellen Maghanoy kadaghanan aning mga jeepney karon kay "kolorum" ug nakabalda sa programa sa gobyerno sa pagbag-o sa pampublikong transportasyon.

Sumala usab ni Priscilla Cabonita nga maoy nag-operate sa Lahug Apas Transport Cooperative (LATRASCO), nakaapekto kini sa kita sa mga operator sa modernong PUV ug miingon si Roberto Orilla, FCTC vice chairman ug head of the Pit-os Talamban Mandaue Transport Cooperative (PITMACO), nga kini nga praktis nagpugong sa ubang operatiba sa pag-modernize.

Busa ilang gihangyo ang Land Transportation Franchising and Regulatory Board (LTFRB) ug the Land Transportation Office (LTO) nga aksyonan kini ug nangayo usab sila og suporta gikan sa kagamhanan sa dakbayan sa Sugbo aron hugot nga masusi ang mga dokumento sa mga jeepney aron masiguro ang pagsunod niini sa mga regulasyon. (BANAT NEWS)