Hepe sa barangay tanod gipusil

CEBU, Philippines —

Midangop sa kapolisan ang hepe sa mga tanod sa Candulawan nga si Fedil Torion kinsa nipakita sa matud pa niya samad pinusilan nga daw garas lang diha sa iyang wala nga dughan.

Siya mialegar nga samtang nagmaneho siya sa iyang motorsiklo diha sa sitio Cruzan sa maong barangay kalit lang mibabag ang usa ka alyas Tian ug walay daghang pasumangil gipusil siya niini apan swerteng wala siya maantimano.

Wala sab maklaro kun unsa nga matang sa armas ang gigamit ug unsay sunod nga nahitabo human siya gipusil sa maong lalaki.

Ang suspek matud pa igsuon kini sa lalaking ilang napalgang patay niadtong miaging semana nga gikatahong gipusil sa usa sa mga barangay tanod sa maong barangay.

Ang maong tanod gikuyogan sa ilang barangay kapitan pagtahan sa kapolisan dala ang matud pa kalibre 45 nga pistola paglabay sa duha ka adlaw.  Giingong duna nay panagbangi ang biktima ug ang mga tanod sa barangay sa nangaging mga buwan.

Si Torion  mialegar nga gibaharan sila ug ang ilang pamilya sa igsuon sa gipatay sa iyang kauban.

Si Torion nakapa-blotter na sab kini sa Talisay City Police Station pipila ka adlaw na ang nakalabay tungod sa matud pa pagbahad sa nagpusil kaniya ngadto sa iyang anak nga wala man unta kini labot sa mga panghitabo.

Padayon ang hot pursuit operation sa kapolisan sa Talisay aron sa pagdakop sa suspetsado. (BANAT NEWS)