Chinese jets mipatapsing sa PAF Patrol Plane

CEBU, Philippines — Giakusahan sa Armed Forces of the Philippines ang Chinese People Liberation Army-Air Force (PLAAF) og peligroso ug panghagit nga mga buhat human duha sa ilang fighter jets ang kalit mipatapsing ug mi-deploy og flares sa atubangan sa abyon sa Philippine Air Force diha sa kalangitan sa Scarborough Shoal niadtong adlaw nga Huwebes.

Ang PAF NC-212i nagpatrolya sa maong dapit pasado alas-9 sa buntag sa dihang kalit kining gipatapsingan sa atubangan sa duh aka fighter jets sa China sumala pa sa pamahayag nga giluwatan ni AFP Chief General Romeo Brawner.

Matud pa niya ang gibuhat sa China: "endangered the lives of our personnel undertaking maritime security operations." Hinuon luwas nga nakabalik sa air base ang PAF patrol aircraft.

Ang maong alegasyon nadugang sa nagkainit na usab nga tension ug posibleng komprontasyon tali sa Pilipinas ug sa China diha sa West Philippine Sea nga padayong giangkong ilaha sa China.

Ang Panatag Shoal o Scarborough Shoal mao ang lugar diin nahitabo ang 2012 standoff nga maoy hinungdan sa pagpasaka sa Pilipinas pinangulohan ni kanhi presidente Benigno “P.Noy” Aquino III og kaso didto sa Arbitral Court, ang korte mipabor sa Pilipinas ug mipakawalay-bili sa pangankon sa China kay wala kini legal nga basihan aron angkunon ang teritoryo.

Apan ang maong Arbitral Ruling gipadaplin sa nisunod nga administrasyong Duterte nga mas gipiling makigsuod sa China.

Mao sab kini ang nakaingon nga natiwas sa China ang pito ka artipisyal nga islang ilahang gisugdan og tukod nga gibabagan sa mga nangaging mga presidente sa nasud.

Ang maong mga isla gihimo na karong forward military bases sa China ug direktang hulga sa seguridad sa Pilipinas tungod sa kaduol niini.

Ang insidente napuno sa taas na kaayong talaan sa pagpanghasi sa China sa mga Pilipino diha sa WPS, ang uwahing bayolenteng komprontasyon nahitabo sa Second Thomas Shoal o Ayungin Shoal diin nahimutang ang BRP Sierra Madre, usa ka sundalong Pilipino ang naputlan og tudlo samtang gikawat ug gipangguba sa Chinese Coastguard ang mga supply nga ilang dala hasta ilang mga armas.

Usa ka adlaw sa wala pa ang insidente tali sa patrol aircraft sa PAF, ang Chinese PLAAF milusad og combat patrol sa lugar nga ang tumong pag-testing sa ilang "strike capabilities" diha sa Ayungin Shoal nga gibantayan sa mga Pilipino.—Gikan sa Philstar.com/IBM