Mga barangay workers nga wa masweldohi gihatagan og ayuda
CEBU, Philippines — Gihatag isip pinansiyal nga ayuda ni Mandaue City Mayor Jonas Cortes ang iyang sweldo ngadto sa 120 ka mga barangay worker sa Barangay Umapad nga wa makadawat sa ilang binulan nga suweldo.
Kini aron katabangan ang mga barangay workers nga napakyas pagdawat sa ilang sweldo sugod pa niadtong Enero hangtud karong buwan sa Agosto ning tuiga.
Una niini nangreklamo ang maong mga barangay workers batok sa ilang Barangay Konsehal nga giingong nibabag sa pagpagawas sa ilang mga sweldo.
Base sa ilang mga reklamo giingong namolitika ang maong mga konsehal human napildi sa barangay elections ang ilang kapartido nga milansar pagka kapitan.
Si mayor Cortes gibati og kaluoy sa kahimtang sa maong mga barangay workers hinungdan nga iyang gihatag ang iyang sweldo isip financial assistance.
Ang mayor gikuyogan ni Bise Mayor Glenn Bercede ug mga sakop sa konseho nga nanghatag usab og mga grocery packs ngadto sa mga barangay workers. (BANAT NEWS)
- Latest
