Sementado nga karsada sa San Fernando magamit na
CEBU, Philippines — Makagamit na og sementado nga karsada ang mga residente sa barangay Sangat ug barangay Lantawan human giinagurahan ang P62.48 milyones nga dalan sa lungsod sa San Fernando habagatang Sugbo.
Ang maong proyekto giinagurahan niadtong Biyernes, Agosto 9 nga gipanguluhan ni Gobernador Gwendolyn Garcia.
Gikongkreto ang Sangat-Lantawan road section nga dunay 2.68 kilometro nga gitas-on ug 6.10 metro ang gilapdon, samtang 9 ka pulgada nga semento ang gibag-on.
Nagpasalamat ang mga kapitan sa duha ka barangay sa kagamhanan sa Probinsiya sa Sugbo nga gipanguluhan ni Garcia human paminawa ang ilang mga yangungo sa maong dalan.
Sa wala pa ma kongkreto ang karsada, mag-antos ang mga residente sa lapok niini kung ting- uwan samtang mamahimong abog kun ting-init.
Gawas sa pagpanindot niini, ang giingon nga dalan ang musumpay sa barangay Sangat ug barangay Lantawan.
Himuon usab kini nga alternative route sa mga motorista aron makatabang sa pagminus sa kahuot sa trapiko sa maong lungsod.
Mitambong sa gihimong inagurasyon mao si District Board Member Raul Bacaltos ug San Fernando Mayor Mytha Canoy.
Subay niini si Canoy sa iyang pagpamulong mipadayag sa iyang pasalamat ngadto sa Probinsiya sa Sugbo nga gipanguluhan ni Garcia.
- Latest