P36.28 road project sa Minglanilla giinagurahan

CEBU, Philippines — Giinagurahan usab ni Cebu Governor Gwendolyn Garcia ang P36.28 million nga bag-o lang usab nga gikongreto nga Tulay-Tungkop road section diha sa lungsod sa Minglanilla habagatang Sugbo niadtong Biyernes, Agosto 9.

Ang Kapitoyol migasto sa maong kantidad sa pagtrabaho sa 2.12-kilometer road section nga dunay 6.10 meters ang gilapdon og 9 inches nga gibag-on sa semento.

Kining maong karsada maoy magsilbing alternative route sa lungsod aron kaminusan ang sitwasyon sa traffic sa national highway.

Segun sa report sa Sugbo News, ang Tulay-Tungkop road section maoy usa sa mga proyekto sa Kapitolyo nga gitumong aron pag-modernize sa road networks sa mga kalungsuran ug siyudad sa probinsiya.

Gikatahu usab nga ang maong proyekto magpalambo sa transportasyon sa lungsod nga maghatag og kasiguruhuan sa mas luwas og efficient nga karsada sa mga Cebuanos.

Sa iyang pagpamulong si Garcia miingon nga butangan usab niya og solar lights nga magsubay sa maong karsada.

“Aron uban sa kahayag sa kagabhion, ang kahayag usab sa kaugmaon sa mga Minglanillahanon,” suma pa ni Garcia.

Ang gobernador usab misaad sa lungsod nga butangan og industrials fans ang covered court sa barangay Tungkop sa Minglanilla. (BANAT  NEWS)