Konseho sa Cebu City niawhag sa buhatan sa mayor pagtukod og PPP

CEBU, Philippines — Gihangyo karon sa konseho sa Dakbayan sa Sugbo ang buhatan sa mayor nga magtukod og Public-Private Partnerships (PPPs) Unit nga mag-standardize sa tanang project proposals nga sudlan sa siyuad ubos sa gimando sa national law.

Si Konsehal Rey Gealon niduso og motion kabahin niini atol sa iyang privilege speech niadtong Miyerkules.

Giaprobahan sa konseho ang iyang resolving clause nga nag-awhag sa Office of the Cebu City Mayor sa pagluwat og executive order sa paghimo og PPP Unit.

Gihangyo usab sa konseho ang samang buhatan sa pagtudlo og mga sakop sa unit.

Gawas niini, nipasar usab ang konseho sa siyudad og resolusyon nga naghangyo sa mayor sa siyudad nga i-mobilize ang Local Development Council nga mobarog isip reception sa mga proposals gikan sa pribadong sektor.

Matud ni Gealon nga andam ang siyudad nga mo abi-abi sa mga pribadong entity nga nagtinguha nga makigtambayayong kong mo subay kini sa balaod, lagda ug regulasyon.

Gitumbok ni Gealon ang Akta Republika 11966 kun “PPP Code of the Philippines” nga gipirmahan nga balaod niadtong Disyembre 5, 2023 ug gipatuman sa samang bulan ug naepektibo kini niadtong Abril 6, 2024.

Si Gealon nagkanayon nga ang PPP code nagtumong sa pagpalig-on ug pag-institutionalize sa mga PPP sa nasud pinaagi sa hiniusang legal framework.

"The PPP code rendered inoperable all existing ordinances such as ours, Cebu City Joint Venture Ordinance, or City Ordinance 2154", ni Gealon pa.

Iyang gipasabot nga ang JVA ordinance sa Dakbayan sa Sugbo nisagop sa NEDA framework nga iyang gidugang nalabwan na karon sa PPP code.

Ang ka epektibo sa PPP code gipulihan niini ang kasamtangang Cebu City JVA ordinance.

Matud usab ni Gealon nga ang PPP code naglangkub sa tanang contractual arrangements lakip na ang JVA, toll operation agreements, lease agreements, rehabilitation, ug maintenance ug uban pa, alang sa tanang government-owned properties.

Ang labing mahinungdanon nga bahin sa PPP code ang pagpadayag sa mga pamaagi sa pag-aproba sa lokal ug national nga mga proyekto sa PPP nga karon ma-standardize na. BDB BANAT NEWS