Gob. Garcia mihulagway sa CBRT nga usa ka kataw-anan nga proyekto
CEBU, Philippines — Gihulagway ni Gobernador Gwendolyn Garcia nga “ridiculous” o kataw-anan ang Cebu Bus Rapid Transit (CBRT) nga proyekto sa mass transportation.
Gitataw ni Garcia nga wala siyay problema sa mass transport, apan dili susama sa CBRT nga sumala sa gobernador nga sa pagkakaron nakamugna og trapiko sa dalan ilabina nga ang “dedicated lane” sa mga bus nakalimit sa dalan alang sa ubang sakyanan.
Sumala pa sa gobernador nga iyang giprankahan si Transportation Undersecretary Jesus Ferdinand “Andy” Ortega kalabot sa epekto sa CBRT sa mga Sugboanon, atol sa pagbisita niini sa iyang buhatan aron hisgotan ang maong proyekto.
“I was very frank with Usec Ortega, I said this is not going to benefit the Cebuanos it’s going to cause untold traffic burden to the Cebuanos. Second, it’s going to cause chaos to existing LTFRB franchises that have already been issued to our transport operators” matud ni Garcia.
Nagkanayon si Garcia nga usa sa gilantaw nga ang mga pampublikong sakyanan ibalhin sa ubang dalan aron dili na moagi sa dalan nga agian sa mga bus sa BRT.
Apan sumala pa sa maong opisyal walay pagtoon kon feasible ba kini.
Si Garcia nagduda nga magkaproblema ang Sugbo sa maong proyekto nga ang pundo giutang ra sab.
"This going to create more problem, chaos on the street" matud ni Garcia.
Giawhag ni Garcia ang DOTr nga ikonsiderar ang sitwasyon sa mga Sugboanon sa pag desisyon alang sa maong proyekto.
Iya pud giawhag ang DOTr nga mohimo og mga lakang pagsuporta sa administrasyon ni Presidente Bongbong Marcos Jr ug dili ang makahatag og dili maayo nga marka sa administrasyon ilabina nga si Marcos maoy mabasol sa proyekto nga dili siya ang naggama.
"I am very defensive of the president kay siya baya ang migroundbreak ani, but this was not his project.... But he wanted to give something to Cebuano people for the support" matud ni Garcia. Kahinumduman si Garcia unang nialma sa desinyo sa bus stations sa CBRT sa dalan Osmeña Boulevard tungod kay makababag kini sa "visual integrity" sa Kapitolyo nga usa ka historical landmark. — MEL BANAT NEWS
- Latest
