Killer sa saleslady, dunay kauban?

CEBU, Philippines — Walay indikasyon nga gilugos ang gipatay nga saleslady nga si Charina Relativo base sa matud pa inisyal nga resulta sa autopsy niini, samtang gusto sutaon sa kapolisan kun aduna pay laing kauban ang suspek nga si alyas Darren sa paghimo sa maong krimen.

Atol sa pakigpulong sa mga sakop sa media,  si Police Regional Office(PRO)-7 Director Brigadier General Anthony Aberin miingon nga base sa extrajudicial confession sa suspek nga si alyas Darren siya rang usa ang nihimo sa krimen.

Apan aron pagwagtang sa mga pagduda gimando ni Aberin nga palawman ang imbestigasyon ug tutukan gyud ang kaso aron mahatagan og hustisya ang pamilya sa biktima.

Samtang si CCPO acting City Director Police Colonel Antonietto Cañete mibutyag sab nga kinahanglan silang mohimo og retesting sa autopsy sa patay'ng lawas.

Kini human niya nasuta nga ang gigamit nga testing kit atol sa pag-autopsy sa expired na. Wala hinuon siya mohatag og rason kun makaapektar ba sa kredibilidad sa autopsy ang paso na nga testing kit.

Apan iyang gibutyag nga base sa inisyal nga resulta sa autopsy,  walay indikasyon nga gilugos ang dalaga apan kinahanglan pa kini usbon tungod sa maong expired testing kit bahala og siyay mogasto para pag-usab sa test.

Hinuon ang PNP Crime Laboratory nipadayag nga aduna nay umaabot nga testing kit gikan sa ilang kaulohan.

Samtang gipahibawo ni Cañete nga gipasakaan na nila og tulo ka kaso ang suspetsado niadtong Lunes, Agosto 5. Kasong illegal possession of firearms, arson ug murder ang gipasaka batok niini.

Ang mga ebidensya nga gipasukip sa kaso mao ang extrajudicial confession sa suspek, forensic examination nga gihimo sa patay'ng lawas sa biktima, ang mga butang nga na recover sa crime scene ug testimonya sa silingan nga nakakita sa suspek nga maoy una ug katapusang nisulod sa kwarto sa biktima.

Naa sab sila'y laing witness nga barkada sa suspek nga giingong gisuwayan matud pa sa suspek nga i frame-up pinaagi sa pagpasulod sa witness sa kwarto sa biktima human sa krimen aron mapasanginlang maoy katapusang dunay access sa crime scene.

"We will just amend the crime of murder into rape with homicide (if ma found out na rape ang victim) because it is allowed under our revise criminal procedure that whenever there is a greater or serious offense discover after the filing of the case it can be amended because murder or homicide is necessarily included in the crime of rape with homicide," ni Cañete pa.

Masaligon si Cañete nga makombikto ang suspek.  –Rowena D. Capistrano, IBM BANAT NEWS