Clock tower 40 ka tuig pa ang pangidaron–Hontiveros

CEBU, Philippines — Ang clock tower sa Fuente Osmeña Rotunda kulang sa gikinahanglang katuigan sukad sa pagkatukod niini aron makab-ot ang 50 ka tuig nga marka aron maprotektahan isip usa ka heritage landmark.

Niadtong Domingo, Agosto 4, 2024 ang clock tower sa Fuente Osmeña giguba gumikan sa nagpadayon nga construction sa Cebu Bus Rapid Transit (CBRT).

Si Acting Cebu City Vice Mayor Donaldo Hontiveros, chairman sa Cultural and Historical Affairs sa Cebu City Council (CHAC) nagkanayon nga kaniadto ang proponent sa CBRT nipadala og suwat nga nangayo og no-objection position sa demolisyon sa maong clock tower.

Ang no objection sa CHAC ubos kini sa probisyon sa Akta Republika Act 10066 kun “National Cultural Heritage Act” nga nagmugna sa Philippine Registry of Cultural Property(PRECUP) ug nihimo og uban pang mga lakang aron mapreserba ang mga historical structure nga kapin sa 50 ka tuig.

Nasayran nga ang clock tower natukod kini niadtong 1984 ug nagpasabot nga 40 na kini katuig.

Matud ni Hontiveros nga dihang nangayo og letter of no objection ang Department of Transportation kinsa proponent sa BRT sa pagguba sa clock tower ang CHAC isip usa ka body nagkanayon nga kinahanglang adunay pagtugot gikan sa tag-iya o sa Lion Club kinsa maoy nagtukod ug nidonar ngadto sa kagamhanan sa siyudad.

Sayo pa, girekomendar sa CHAC nga ibalhin ang istraktura ngadto sa Plaza Rotunda sa samang dapit kon aduna sila’y budget alang sa pagbalhin.

Gawas niini, girekomendar usab sa CHAC ang pagpreserba sa istraktura sa museum hangtud sa panahon nga anaa kini kabalhinan.

 “Unya kay wa man siya kaabot sa 50 years (requirement), so dili gyud siya ma kuan (covered) sa RA 10066”, matud ni Hontiveros.

Matud ni Hontiveros nga walay budget appropriation ang DOTr aron mapreserba ang orasan o mabalhin kini.  (BANAT NEWS)