DSWD mipalapad sa paghatag og tabang medikal sa katawhan

CEBU, Philippines — Padayong makigtambayayong ang Crisis Intervention Section (CIS) sa Department of Social Welfare and Development (DSWD) sa Central Visayas sa mga botika, ospital, ug uban pang medical service providers alang sa mga tawo nga nakasinati og krisis.

Ang DSWD, pinaagi sa CIS kung asa nasubay ang Assistance to Individuals in Crisis Situations (AICS) nga programa, miuyon sa pakigtambayayong sa 5 ka botika, 7 ka ospital, ug 2 ka laing medical service providers sa mutual nga obligasyon ug responsibilidad, sa tibuok rehiyon.

Sa bag-ohay lang nga pinirmahay sa mga kasabutan nga gipangulohan ni Regional Director Shalaine Marie S. Lucero, subling gipasalig sa DSWD-7 ang pagpalapad sa ilang network kinsa makahatag og tabang medikal sa mga indibidwal ug pamilya nga nakasinati og kalisdanan sa panginahanglang medikal.

Ang ahensya nakig-alayon sa Medicart Pharmacy, Dannes Pharmacy, Majesty Pharmacy, ug Garrod Incorporated, nga nagtanyag og mga tambal ug uban pang mga gamit sa medisina, ug ang Orthopro Philippines Corp., nga nagtanyag og prosthesis nga serbisyo.

Dugang sa listahan mao ang Cebu Doctors Group of Hospitals, diin ang mga kliyente sa AICS mahimong makapahimulos sa nagkalain-laing medical goods ug serbisyo nga gitanyag sa Cebu Doctors University Hospital, South General Hospital, Mactan Doctors Hospital, ug North General Hospital.

Ang DSWD maghatag og guarantee letter nga nagpakita sa kantidad sa tabang base sa assessment, alang sa mga kliyente sa AICS aron makadawat sila og medikal nga tabang, lakip ang pagpaospital, mga tambal, ug mga laboratory test, diin direktang bayran sa ahensya ang mga accredited partner nga nagtanyag sa mga goods ug serbisyo nga ilang kinahanglan.

Si Lucero miingon nga bulahan gyud sila nga nakabaton og kaabag sa pagpalambo sa ilang paghatud sa serbisyo ngadto sa katawhan ug kini usa ka testamento nga ang DSWD dili makatrabaho nga mag-inusara kung wala ang tabang sa ubang mga stakeholders. (BANAT NEWS)