DOLE migahin og dakong pundo para mas daling makatrabaho ang Kabataan

CEBU, Philippines — Mas gipadak-an sa gobiyerno ang pundong gigahin karong tuiga para sa Youth Employability Program ubos sa Department of Labor and Employment (DOLE).

Kumpara sa miaging tuig, niumento og PhP449 milyones o 84 porsyento ang pundong gigahin sa gobyerno  gikan sa P984.2 milyones nga pundong gigahin para sa maong departamento ning tuiga ug halos katunga niini gamiton aron mas mapalig-on pa ang mga employability program alang sa mga estudyante ug kabatan-onan.

Nagkanayon si Department of Budget and Management (DBM) Secretary Amenah Pangandaman nga ang Special Program for Employment of Students (SPES) sa DOLE dunay PhP828.9 milyones nga alokasyon, samtang ang Job Start Program (JSP) niini dunay PhP155.2 milyones.

Kahinumdoman nga atol sa ikatulong State of the Nation Address (SONA) ni Presidente Ferdinand R. Marcos Jr., iyang gihisgutan ang mga pagpaningkamot sa nagkalain-laing ahensya sa gobyerno aron mapalambo ang potensyal sa mga batan-ong Filipino ug ang ilang kapasidad nga makatrabaho.

Kini ubos sa National Expenditure Program (NEP) 2025 nga gigahinan og PhP6.352 trilyones nga pundo sa DBM o 10.1 porsyento nga mas taas gikan sa PhP5.758 trilyones nga budget karong tuiga.

Nahiuyon usab kini sa mga nag-unang prayoridad sa Philippine Development Plan para sa tuig 2023 hangtud 2028, nga nagtutok sa pagpalambo ug pagpanalipod sa mga kapasidad sa mga indibidwal ug pamilya; pagbag-o sa mga sektor sa produksiyon aron makamugna og mas de kalidad nga trabaho ug competitive nga mga produkto; ug paghimo sa usa ka makapaarang nga palibot.