BJMP-7: Di kinahanglang padak-an ang prisuhan

CEBU, Philippines — Imbes magtukod og dugang mga prisohan, mas gihatagan og pagtagad sa Bureau of Jail Management and Penology Central Visayas (BJMP-7) nga palig-unon ang ilang paralegal service aron mamenusan ang paghuot sa ilang mga pasilidad sa rehiyon.

Kini maoy gipadayag ni BJMP-7 Regional Director, Jail Chief Superintendent Neil R. Aviasado may kalabotan sa paspas nga pagsaka sa gidaghanon sa mga suspetsado sa nagkadaiyang krimen nga mabilanggo itandi niadtong mga nakagawas.

 “We do not really need now na kailangan mag increase ng facility namin dahil matagal. Kaya doon nag fofocus sa paralegal services kung paano namin palayain ang dapat nang lumaya. Para hindi mag overstay,” sigon ni Aviasado.

Giangkon sab niya nga aduna gyud silang problema sa “manpower” nga modumala sa paralegal nga serbisyo, kay sa usa ka jail facility aduna lang usa o duha ka mga paralegal officers nga moatiman sa mga kaso sa mga inmates.

Pinaagi sa programa, matabangan ang mga piniriso sa nagkalain-laing mga pamaagi aron mapadali ang ilang paggawas ug aning paagiha mamenusan ang kahuot sa mga prisohan.

Ang mga regional ug jail paralegal officers nagdumala sa mga padayon nga seminar ug orientation para sa PDLs bahin sa ilang mga katungod, mga pamaagi sa maagang pagpagawas, ug uban pang paralegal/legal nga mga remedyo nga mahimo nilang magamit.

Lakip sa uban sa serbisyong gitahas nga ilang ihatag ngadto sa mga inmates mao ang paralegal counseling ug pagsubay sa ilang mga kaso kun unsa nay nahitabo niini diha sa mga korte. (BANAT NEWS)