P253.3 bilyong gigahin sa ayuda sa mga naapektuhan sa inflation

CEBU, Philippines —  Nigahin ang gobyerno og P253.3 bilyones sa National Expenditure Program 2025 aron maghatag og tabang pinansyal sa mga Filipino nga naapektuhan sa pagsaka sa presyo sa mga palaliton.

Matud ni Department of Budget and Management (DBM) Secretary Amenah Pangandaman nga magpadayon ang gobyerno sa pagpatuman sa mga interbensyon sa budget sa sunod tuig aron mapugngan ang epekto sa inflation.

Ang NEP 2025 naglakip og pundo alang sa sektor sa Department of Social Welfare and Development (DSWD), Department of Health (DOH), Department of Labor and Employment (DOLE), Department of Transportation (DOTr), ug Department of Agriculture (DA).

Ang DSWD adunay P205.5 bilyones alang sa mga programa niini sama sa Pantawid Pamilyang Pilipino Program (4Ps) nga adunay P114.1 bilyones; Social Pension nga P49.8 bilyones; Protective Services nga P35.1 bilyones; Sustainable Livelihood Program (SLP) nga P4.4 bilyones; ug ang Walang Gutom: Food Stamp Program nga P1.8 bilyones. Ang mga pamilyang nigradwar usab sa 4Ps makadawat gihapon og seed capital pinaagi sa Sustainable Livelihood Program (SLP) aron matabangan silang magsugod sa ilang kaugalingong negosyo.

Samtang ang DOH nakadawat og P26 bilyones alang sa Medical Assistance for Indigent Program (MAIP) ug P1.25 bilyones para sa Cancer Assistance Fund (CAF).

Ang DOLE, adunay P14.1 bilyones nga pundong gigahin para sa Tulong Panghanapbuhay sa Ating Disadvantaged/Displaced Workers (TUPAD).

Alang sa sektor sa transportasyon, ang DOTr nakakuha og P2.5 bilyones alang sa fuel subsidy program niini, samtang ang DA mopatuman usab og fuel assistance nga nagkantidad og P100 milyones alang sa mga mag-uuma ug mananagat. (BANAT NEWS)