Tanghaga sa kamatayon sa saleslady

CEBU, Philippines —  Lalaki kansang hulagway nag-viral sa social media nga kini gipangita may kalabotan sa kamatayon sa 27-anyos nga saleslady, anaa na sa kustodiya sa kapolisan Police Station 7 sa Cebu City Police Office  alang sa mga pagpangutana.

Kini samtang gipaabot pa ang resulta sa autopsy patay'ng  lawas ni Charina Relativo kinsa napalgan nga patay sulod sa kwarto niini sa giabangang boarding house sa Sitio Laguna, Barangay Bulacao, siyudad sa Sugbo, Biyernes sa udto, Agosto 2, 2024.

Giingong wala na kini sapot ug nasunog ang buhok. Si Police Major Jiceree Basitao, Hepe sa Police Station 7 miangkon nga sa pagkakaron dili pa sila makabutyag kung giunsa paghimo ang krimen o kun duna ba gyuy foul play sa nahitabo kang Relativo.

Dunay mga nanggawas nga estorya ilabi na sa social media nga gilugos ug gituyo sa pagpatay ang biktima, apan si Basitao miingon nga ilaha unang paabuton ang opisyal nga resulta sa otopsiya.

Tan-awon sab nila nga kun ang pagkasunog sa buhok niini binuhatan og laing tawo aron tabunan ang salaod nga nabuhat.

"As of now naa tay gitan-aw nga anggulo so magbase lang gihapon ta sa autopsy report kay based on initial findings kung tan-awon nimo limpyo man pero ang visible lang nga signs didto is katong nasunog ang ulo. So, una nato tan-awon either personal grudge pero as of now as to naa man guy ni nikaylap nga estorya nga gi-rape. Pero again, I just want to clarify we will be awaiting results of the kanang autopsy report usa ta maka conclude nga gi-rape ba ning victim," pasabot ni Basitao.

Lima ka tawo ang giimbitar sa kapulisan alang sa paghatag og katin-awan ug dugang impormasyon sa maong hitabo.

Usa niini ang kapuyo sa biktima,  usa ka alyas Darren nga maoy gitawagan sa kapuyo sa biktima aron pukawon ang biktima kay di motubag sa tawag sa cellphone niini,  usa ka alyas Tony nga giingong maoy gisangpit ni alyas Darren aron kuyogan siya sa pagpukaw sa biktima; ug ang igsuon sa kapuyo sa biktima nga kauban nila og puyo sa maong kuwarto ug  ang laing usa ka alyas Opaw nga giingong maoy kainom ni alyas Darren anang gabhiona.

Apan sa lima nga giimbitar, si alyas Darren lang ang wala nitunga sa police station. Si alyas Darren adto na nakuha sa kapolisan sa balay sa amahan sa uyab niini diha sa barangay Sambag 2.

Giklaro ni Basitao nga dili pa sila makasulti nga si Darren ang suspek. Ang pag imbitar kaniya  gihimo sa pamasin nga naa siya'y dugang impormasyon nga mahatag nga makasulbad o makatubag sa mga pangutana kay matud pa siya ang pinakauna nga tawong nakakita sa patay'ng lawas.

"I just want to clarify nga as of now we cannot conclude nga he is the suspect, ato lang siya giawhag nga mopatim-aw just to number 1, to clarify his name, number 2, para makapangayo ta og additional information," ni Basitao pa.

Gikataho nga adunay silingan nga nangangkon nakadungog og tingog gikan sa usa ka lalake nga nag-ingong ‘dili dunggabon.’ Usa kini sa gisusi karon sa kapulisan.

Ang pamilya ni Relativo wala magdahum nga mouli kini sa ilang balay nga anaa na sulod sa lungon.

Ang dalaga gikatakda untang motambong sa haya sa iyang kinugos sa Barangay Bolasa, Lungsod sa Argao kagahapon adlaw nga Sabado, apan siya naman sab diay ang hayaon.

Ang inahan sa dalaga nga si Letecia, nibutyag nga buotan ug matinabangon nga anak si Charina maong nangita sila og hustisya para sa anak kun gipasipad-an man kini og tawo.

Dako ilang pagtuo nga ang mga nakita nilang bun-og sa lawas sa anak agi kadto sa paninguha niining protektahan ang kaugalingon.

Si Kapitan Dave Tumulak sa Barangay Basak Pardo usa sa mga nangusog sa panawagan para sa makatabang sa pagsulbad sa tanghag sa kamatayon ni Charina. (BANAT NEWS)