Cebu City nanghatag og school kits sa pampublikong tunghaan

CEBU, Philippines — Gisugdan na sa pag-apod-apod sa lokal nga kagamhan sa Dakbayan sa Sugbo ang mga school kit ngadto sa mga pampublikong tunghaan sa siyudad kagahapon.

Ang pagpang-apod-apod sa school kits gipangulohan kini ni Acting Cebu City Mayor Raymond Alvin Garcia uban sa pipila ka opisyales sa siyudad.

Kagahapon upat ka tunghaan ang gipanghatagan nga gilangkuban sa Alaska Mambaling Elementary School nga 2,403 kits; Mambaling Elementary School nakadawat og 2,068; Punta Elementary School nakadawat og 2,459 ug Don Vicente Rama Elementary School nga nakadawat og 4,119.

Matut ni Garcia nga ang kabatan-onan maoy paglaum sa ugma ug giawhag ang mga kabataan nga mopadayon sa pagtungha ug dili nila kini ibalewala.

Sa laing bahin, malinawon ang usa ka semana nga pagsugod sa klase sa Siyudad sa Sugbo base sa report sa Cebu City Police Office(CCPO).

Matud ni Police Lieutenant Colonel Janette Rafter, deputy city director for administration sa CCPO nga walay natala nga mga panghitabo nga naglambigit og mga tinun-an.

Gipanglantawan sa kapolisan nga sunod semana mohuot na ang dagan sa trapiko tungod kay pipila ka mga private school ug universities na usab ang magbukas og klase.

"As of now with the opening of classes last Monday up to the present very peaceful and safe atong mga estudyante sa ilang mga tunghaan",  padayag ni Rafter.

Magpabilin ang presensiya kapolisan sa mga tunghaan aron malikayan ang bati nga panghitabo. (Decemay P. Padilla/BDB) BANAT NEWS