Usa ka dakong kompaniya mogama og feasibility study sa MCE

CEBU, Philippines — Usa ka dakong kompaniya ang mohimo og survey ug feasibility study sa Metro Cebu Expressway (MCE) nga magdugtong sa mga siyudad sa Naga ug Danao.

Ang Spanish multinational conglomerate maoy mohimo sa maong pagtuon.

Ang direktor sa infrastructure sa Southeast Asia Ruben Camba nagkanayon ngadto kang Gobernador Gwendolyn Garcia nga adunay Japanese investor nga nipadangat og interest nga mopundo sa 74 kilometro nga expressway nga magsilbing alternatibong rota ngadto sa bukirang bahin sa Sugbo ug magdugtong sa mga lungsod sa habagatan ug amihanan.

Atol sa ilang tigom ni Garcia sa Kapitolyo, si Camba nihangyo sa mga dokumento pagsuata sa feasibility sa maong proyekto gikan sa “business perspective” lakip na ang gidaghanon sa mga bus nga moagi gikan sa Cebu South Bus Terminal (CSBT). Gihangop ni Garcia ang maong hangyo ni Camba ug nagkanayon nga ang Kapitolyo andam nga motabang sa Acciona sa ipahigayon niini nga pagtuon sa maong proyekto.

Ang MCE usa kini ka proyekto nga gipatuman sa Department of Public Works and Highways nga gitang-tang usab sa ahensiya sa listahan sa mga proyekto nga prayoridad niini nga ipatuman. Ang Probinsiya sa Sugbo nihangyo nga kini na ang mopatuman sa maong dakong proyekto uban sa pribadong sektor.

Ang Acciona, mao usab ang kompaniya nga kasamtangang nagtrabaho sa solar power plant sa Lungsod sa Daanbantayan. (BDB) BANAT NEWS