1,000 ka estudyante nakabenipisyo sa tutoring program sa DSWD

CEBU, Philippines — Kapin sa 1,000 ka tinun-an sa kolehiyo gikan sa lain-laing state universities ug colleges (SUCs) ug lokal nga unibersidad nga gidumala sa gobiyerno sa Visayas ug Mindanao ang nakabenepisyo sa Tara, Basa! Tutoring Program sa Department of Social Welfare and Development (DSWD).

Sa kinatibuk-an adunay 1,625 ka estudyante sa kolehiyo ang nahatagan og higayon dili lang sa pagpahimulos sa gi-reformat nga educational assistance sa DSWD, apan lakip usab ang makakat-on og hustong kahibalo aron makatabang sa pagpalambo sa reading proficiency sa mga estudyante sa elementarya.

Sa pagtapos sa 20 ka adlaw nga sesyon sa maong programa niadtong Hulyo 26, 2024 gipahigayon ang usa ka simultaneous culminating activities sa rehiyon 7, 8, 10, ug 12, diin giila sa DSWD ang ilang mga paningkamot  sa pagtudlo sa naglisod ug dili makabasa nga umaabot nga grade 2 nga mga tinun-an uban sa ilang mga ginikanan o guardians.

Subay niini, gipasiugdahan ni DSWD-7 Spokesperson ug Assistant Secretary Irene Dumlao nga ang edukasyon ug kooperasyon sa komunidad mahinungdanon alang sa padayon nga pag-uswag sa mga kabatan-onan.

“The tutoring program aims to increase the involvement in nation-building of poor college students and those enrolled in state or local universities and colleges, while helping them in completing their tertiary education”, matud ni Dumlao.

Usa ka student-tutor nga si Claire Kristine Grace Balais gikan sa Samar State University nagkanayon nga mahinungdanon ang papel sa mga estudyante sa iyang propesyonal nga paglambo isip usa ka magtutudlo tungod kay sila usab makakat-on gikan sa mga estudyante.

"The experience taught me that as a teacher we are the one to first believe in our learners and the last one to give up on them. It’s two-way since they are teaching you as well,” matud ni Balais sa student-tutor.

Matud usab sa laing tutor gikan sa Cebu City nga si Lyster Arbutante, usa ka 3rd-year student sa Bachelor of Secondary Education (BSED) Social Studies nga ang iyang kasinatian sa programa makatagbaw kaayo sanglit samtang nitabang siya sa uban nakakwarta usab siya ug dili na siya kinahanglan mangayo og allowance sa iyang mga ginikanan.

Ang tutoring ug Nanay-Tatay parenting nga sesyon gipahigayon sa Visayas ug Mindanao sugod niadtong Hulyo 1 ug natapos sa Hulyo 26, 2024. (BANAT NEWS)