Mananga river giplanohan nga butangan sa Carbon PH project
CEBU, Philippines — Ang Mananga River sa siyudad sa Talisay ang usa sa mga lugar nga gitan-aw ug giila karon sa Kapitolyo nga potensyal nga lugar kun asa ipatuman ang Carbon PH Project niini uban sa usa ka pribadong kompaniya.
Tinguha sa maong proyekto mao ang pagtubag sa problema sa tubig pinaagi sa pagpananom og sobra sa 10 milyon ka mga kahoy diin usa sa goal niini mao ang pag rehabilitate ug pagsustiner sa Central Cebu Protected Landscape (CCPL) ug sa mga lugar nga anaa ra sa maong dapit.
Ang Carbon PH project usa ka mullti-partite reforestation ug watershed recovery nga gipangulohan sa kompaniya nga Aboitiz Group nga nag target og 13, 000 ngadto sa 15, 000 ka ektarya sa luna sulod sa CCPL ug dugang 25, 000 ka ektarya sa silingang forest land.
“Atong i-rehabilitate, mananom tag mga kahoy. Panamnan gyod na nato kay kung di na nato tamnan, mao ra gihapon, mouga ra gihapon ta,” matud ni gobernador Gwen Garcia atol sa iyang tigom uban nila ni Cebu City Acting Mayor Raymond Garcia ug Talisay City Mayor Samsam Gullas niadtong Hulyo 31.
Mitambong usab sa maong tigum mao ang Aboitiz Foundation president nga si Ana Margarita Hontiveros-Malvar; Metropolitan Cebu Water District general manager Edgar Donoso; DENR PENRO official Arnold Omandam; DPWH first district Engineer Leslie Molina; hepe sa EMB 7 Environmental Impact Assessment Section nga si Engr. Mary Ann Bueno.
Apil usab ang mga kontraktor nga maoy nagpahigayon og desilting sa mga sapa sa Mananga ug mga barangay kapitan gikan sa mga concerned area sa Talisay ug Sugbo. (BANAT NEWS)
- Latest
