49 ka barangay gideklara nga drug cleared
CEBU, Philippines — Nag-convened ang Regional Oversight Committee on Barangay Drug Clearing (ROCBDC) niadtong Miyekules, Hulyo 31, 2024 diha sa PDEA Regional Office sa Barangay Lahug, Siyudad sa Sugbo alang sa deliberasyon sa application sa drug-cleared status sa 49 ka barangay.
Sa 49 ka barangay, 25 niini gikan sa Cebu Province, 12 sa Bohol, walo sa Negros Oriental, usa sa Cebu City ug tulo sa Lapu-Lapu City. Ang tanan gideklarar nga drug cleared.
Si PDEA-7 Director Emerson Margate kinsa mao usab ang chairman sa ROCBDC-7 maoy ni-preside sa meeting.
Ang ubang miyembro sa komitiba nga nitambong mao si sila si Celerino Magto, Jr., sa DILG-7, Police Major Rey Delos Santos sa PRO-7 ug Dr. Jonathan Neil Erasmo sa DOH-7 ug uban pa.
Nitambong usab pinaagi online ang mga representante sa Local Government Units.
Atol sa kalihokan, 43 ka drug-cleared barangays ug 20 ka drug-free barangays ang opisyal nga na-retain ang ilahang status.
Ang proseso sa validation ug verification sa drug-cleared ug drug-free barangays gihimo aron masiguro nga ang mga barangay nakasustenir sa ilang anti-illegal drug programs ug ang bag-ong drug activities o relapse cases natubag dayon.
Subay niini, ang tulo ka nahisgutang barangay sa Lapu-Lapu gilangkuban sa Pangan-an, Caubian and Kalawisan.
Ang maong mga barangay adunay satisfactory sa pag-comply sa tanang rekisitos ubos sa PDEA memorandum.
Matud ni Garry Lao, pangulo sa City of Lapu-Lapu Office for Substance Abuse Prevention (CLOSAP) nga sa 30 ka barangay sa siyudad aduna nay napulo nga drug cleared ug usa ang drug free nga mao ang Barangay Caohagan sukad niadtong tuig 2019.
Gibutyag ni Lao nga ang PNP ug PDEA motabang kanila tungod kay mga national sila nga ahensiya nga gitahasan aron masustiner ang drug clearing. (BANAT NEWS)
- Latest
