‘Police asset’ gibirahan patay
CEBU, Philippines — Patay ang usa ka lalake nga matud pa police asset sa dihang kini gipusil sa wala pa mailhing tawo diha sa Sitio Cadigau Apid, Barangay Cantabaco, Dakbayan sa Toledo kagahapon sa alas 4 sa kaadlawon adlaw nga Huwebes.
Ang biktima mao si Fritz Kim Bacatan Cabungcal, 35, dunay kaipon, wala'y trabaho ug residente sa Dasuga, Barangay Don Adres Soriano Lutopan, Toledo City.
Sa impormasyon sa Toledo City Police Station nakadawat sila og tawag gikan sa concerned citizen nga nakadungog sila og buto sa armas.
Sa pagabot sa kapolisan, naabtan nila ang biktima nga nagbuy-od sa dalan samtang nagkabayo pa sa iyang natumba na nga motorsiklo.
Nasayran ang biktima usa ka drug personality ug ilado matud pa kini nga police asset o informant nga miresulta sa pagkasikop sa nga drug pushers sa ilang lugar.
Narekober sa crime scene ang usa ka slug sa wala pa matino nga kalibre sa armas. Gidala pa ang biktima sa tambalanan apan gideklarar kining dead on arrival.
Ang kapulisan sa dakbayan sa Toledo padayon ang imbestigasyon ug gi-review na nila ang mga aktibo ug functional CCTV sa dapit. (BANAT NEWS)
- Latest
