Inutang nga jeepneys ipang-uli

CEBU, Philippines — Hugtanong gisupak sa Federation of Cebu Transport Cooperative nga gilangkoban sa nagkadaiyang kahugpongan sa mga modernized PUJ operators sa Sugbo ang pagsuspenso sa senado sa Public Utility Vehicle Modernization Program (PUVMP).

Ang ilang bahad, ilang ipang-uli ang mga inutang nilang units ngadto sa bangko kun ugaling ipatuman gayud kini sa senado.

Nagkahiusa ang nagkadaiyang kooperatiba sa modernized public transport sa Sugbo sa ilang pagsupak sa suspensiyon kay di kini makiangayon alang kanila kay sila misunod sa paghimong moderno sa natad sa transportasyon nga gimando sa gobiyerno.

Base sa datus nga nakuha sa grupo 81 porsyento na sa tibuok nasud ang nakapa consolidate alang sa PUJ modernization program.  Nadismaya ang maong grupo nga mas gihatagan og gibug-aton sa mga senador ang 19 percent nga nagmagahi sa pag consolidate

Sa Central Visayas moabot na sa 98-percent ang consolidated na ang mga PUJ base sa data usab sa LTFRB-7.

Pinangulohan sa Presidente sa Federation nga si Ellen Maghanoy sa El Pardo Transport Cooperative moapilar sila mismo ni President Ferdinand "Bongbong" Marcos Jr. nga ipadayon ang nasugdan nga programa.

Niadtong Abril 30 napupos ang deadline alang sa consolidation nga gitakda sa Presidente.

Gikatakdang mopahigayon og lihok protesta ang pederasyon karong August 5 sa buntag nga sugdan sa uptown area sa Cebu City ug momartsa sila padung sa buhatan sa LTFRB Region 7, kini isip pagpakita sa ilang pagsupak sa Senate resolution nga gihulagway nilang mopatay sa ilang panginabuhian.

Dugang pa sa mga opisyal sa pederasyon apektado matud pa sila karon nga duna pay mga unconsolidated PUJ nga nagdagan nga maoy ilang kompetisyon.

Hapit sa katunga ang nawagtang sa ilang kita matag adlaw ug mosamot nga dili na kuno sila makabayad sa ilang loan sa mga bangko.

Himuon sa grupo ang tanang diplomasyang lakang pagtuktok sa kagamhanan apan kun dili gayud mamati sa ilang yangungo mapugos sila sa paggarahe sa ilang mga sakyanan ngadto sa mga bangko nga ilang giutangan nagpasabot kini nga mosangpot sa pagkaparalisar sa transportasyon ang sitwasyon.

Gipadayag ni LTFRB-7 Regional Director Eduardo Montealto nga respetohon na ang katungod sa transport group sa pagpadangat sa ilang sentimento. (BANAT NEWS)