Mga BHW mahimo na nga mokuha og civil service eligibility

CEBU, Philippines — Giawhag sa Civil Service Commission (CSC) ang mga barangay health workers nga mokuha og career service eligibility nga mahimong magamit sa ilang pag-apply og permanenting trabaho sa gobyerno.

Ang pangulo sa CSC nga si Karlo Nograles nagkanayon nga ang Republic Act (RA) No. 7883, o ang Barangay Health Workers’ Benefits and Incentives Act of 1995, nga gipamantala sa CSC pinaagi sa Resolution No. 992845 nag-grant og civil service eligibility sa BHW paghatag og dungog sa serbisyo nga nahatag nila isip mga frontliner sa barangay.

“The Barangay Health Worker Eligibility (BHWE) serves as a token of appreciation, recognizing not only their invaluable role as a special partner in promoting a healthier nation but also their dedication to public service” matud ni Nogales.

Base sa RA. 7883, mahatagan og second grade eligibility ang usa ka barangay health worker nga nakahatag na og lima ka sunod sunod nga tuig nga serbisyo sa barangay.

Dugang sa maong balaod, nga kon ang maong barangay health worker mahimo na nga regular nga empleyado sa gobyerno, ang kinatibuk-an nga tuig sa serbisyo niini isip barangay health worker maapil usab sa pagkwenta sa retirement benefit nga makuha niini. (BANAT NEWS)