Rider nga nigukod sa nakadasmag og pedestrian gipasidunggan

CEBU, Philippines — Gidayeg ni Atty. Kent Francesco Jongoy, assistant head sa Cebu City Transportation Office CTTO ang bayanihon nga buhat sa usa ka ride-hailing app driver Reigner Casas human sa pagtabang niini sa nahitabong aksidente sa karsada diha sa Inglis, V. Rama Avenue.

Si Casas gipasidunggan sa CCPO Traffic Enforcement Unit kagahapon tungod sa bayanihon nga buhat niini nga niresulta sa dinalian nga pagsulbad sa kaso.

Si Casas nakadawat ug certificate of commendation gikan sa kadagkuan sa Traffic Enforcement Unit lakip usab ang groceries ug bugas.

Si Jongoy, nipahibalo nga atol sa ilang meeting sa Traffic Management Board ilang tukion ang paghatag usab ug pasidungog kang Casas pinaagi usab sa resolution nga giluwatan sa CCPO Traffic Enforcement Unit.

Dugang pa ni Jongoy, ang gihimo ni Casas dako og tabang sa kapolisan ug traffic enforcer ilabi na sa paghimo og imbestigasyon human wala kini magduha duha sa paggukod sa driver nga nakaigo og pedestrian nga nakalas niadtong Hulyo 26,2024.

Si Police Lieutenant Colonel Miguel Andeza, Hepe sa TEU CCPO miingon nga mapasalamaton sila sa tabang ni Casas kay nasulbad dayon ang kaso.

Si Casas sa iyang bahin mapasalamaton sa pag-ila sa kapolisan sa iyang ginagmay nga nahimo nga nagtinguha lang sa pagtabang sa biktima gani iya ng giawhag ang ubang mga riders sa paghimo usab sa ingon.

"Kung naay atong ikatabang sa kapolisan, sa traffic or unsa pana diha sa dalan tabang ta kay wala may laing magtinabangay kita-kita ra pud", matud ni Casas.

mohatag usab og pasidungog kang Casas ang kagamhanan sa dakbayan sa Sugbo. (BANAT NEWS)