Lingaw nga pagbukas  sa klase

CEBU, Philippines — Mga nagkaidayang eskwelahan sa Sugbo ang nagpahigayon og lain-lain nga pakulo subay sa pagbukas sa klase kagahapon, adlaw nga Lunes, Hulyo 29, 2024.

Sa ganghaan pa lamang sa Tejero Elementary School bongga na ang desinyo sama sa arko nga gibutangan og mga dayan-dayan apil na sa mga lawak-saringan nga matud pang Dr. Phemala Oliva, ang principal sa Tejero Elementary School, maoy nakapadaug nila isip best billeting school sa bag-o lang nahuman nga Palarong Pambansa.

Gitugotan usab ang mga ginikanan nga kuyogan ilang mga anak sa sulod sa school campus aron dili mahadlok ang mga bata. Sa pikas bahin, gihulagway sa Police Regional Office(PRO)-7 nga malinawon ug wa silay natalang mga panghitabo nga nakabalda sa pagbukas sa unang adlaw sa klase sa gibanabang 3,800 ka pangpublikong tunghaan sa rehiyon. Matud ni Police Lieutenant Colonel Gerard Ace Pelare, tigpamaba sa PRO-7  magpadayon ang ilang pagbantay.

Ang unang adlaw gyud maoy gitutokan kay gikuyogan sa mga ginikanan ilang mga anak.

Sa Talisay City nagbutang og help desk ang mga tunghaan nga gibutangag mga magtutudlo aron paggiya sa mga bata ug mga ginikanan. (BANAT NEWS)