Task force kontra POGO umolon
CEBU, Philippines — Usa ka task force ang planong umolon aron sa paggukod aning patago-tago nga Philippine Offshore Gaming Operators (POGO) ug Pogo-like activities dinhi sa dakbayan sa Sugbo.
Ang task force langkoban sa mga sakop sa lokal nga kapolisan ug sa Business Permit and Licensing Office (BPLO) sa dakbayan.
Mao kini ang marching order ni acting Cebu City Mayor Raymond Alvin Garcia ngadto sa bag-ong city director sa Cebu City Police Office (CCPO), Police Colonel Antonietto Y. Cañete nga maoy nihulip kang Police Colonel Ireneo Dalogdog niadtong Biyernes, Hulyo 26, 2024.
Kini human sa pag ban sa POGO sa nasud atol sa 3rd State of the State of the Nation Address (SONA) ni Presidente Ferdinand Marcos Jr., niadtong Hulyo 22, 2024.
Si Garcia sa unang mga report nagkanayon nga walay aktibo o legal nga POGO operators sa siyudad gikan sa 40 mil ka rehistradong mga patigayon dinhi base sa talaan sa BPLO.
Apan bisan pa niini wala isalikway sa mayor nga adunay tinago-tago o POGO-like nga nag-operate dinhi nga nigamit og lain-laing takuban sama sa Business Process Outsourcing.
Gusto ni Garcia nga dunay himuong “random check” sa mga BPO, apil na ang pagsusi sa ilang mga permits ug lisensiya kun subay ba gyud sa ilang operasyon.
Una niini, ang chairman ug CEO sa Philippine Amusement and Gaming Corp. (PAGCOR) nga si Alejandro Tengco mibutyag nga nakadawat sila og mga taho nga adunay mga kalihokan nga POGO-like activities sa Central Visayas, partikular sa Sugbo.
“Mao man gud na ilang giingon gud nga there are illegal or POGO-like businesses operating in Cebu, not only in Cebu City but also in the other areas but they are disguised as call centers of BPOs, mao nga we will be looking to that, mao ng naay task force,” matud ni Garcia. (BANAT NEWS)
- Latest
