Palma miawhag sa katawhan pagbarog sa kalig-on sa pamilya

CEBU, Philippines — Giawhag ni Cebu Archbishop Jose Palma ang katawhan sa pagbarug alang sa kalig-on sa matag pamilya ug pagsukol sa bisan unsang lakang aron mahimong legal ang diborsyo.

Kini mao ang pamahayag sa Arsobispo atol sa prayer rally nga gitambongan sa liboan ka mga magtutuo nga adunay tema Yes to Marriage and Family: No to Divorce.

Sumala pa ni Palma, bisan ug wala gitago sa katilingban ang mga hagit nga giatubang sa pamilyahanong kinabuhi, angay usab nga tagdon sa magtiayon ang maayong mga kasinatian ug resulta sa ilang relasyon sa Ginoo.

Gibutyag sa Arsobispo dili ikalimod ang daghang problema, apan dili mapiyong ang daghang yanong kalipay nga nasinati sa magtiayon, dili tanang panahon naay away ug dunay problema.

Dugang pa sa Arsobispo, angayan tan-awon usab ang kalipay ug kaanyag sa pamilya ug magpasalamat kita sa Dios.

Gihatagan og gibug-aton niini ang baruganan sa simbahan may kalabutan sa maong butang dili sa pagkabalaan kon dili sakto nga buhaton isip kristyano ang pagpatunhay sa relasyon sa bana ug asawa.

Si Retired Chief Justice Hilario Davide Jr niinsister nga ang paghimo sa diborsyo mao ang pagguba sa pamilya ug sa nasod base sa Section 1 Article 15 nga nagpadayag nga ang pamilya maoy pundasyon sa usa ka nasud.

Si Davide nihagit sa mga magtutuo sa pagpadayon sa pagpasiugda sa importansya sa pamilya ug pagpalig-on sa panaghiusa sa mga magtiayon.

Ang prayer rally gitambongan og liboan ka mga magtutuo gikan sa nagkadaiyang simbahan ug organization taliwala sa dili maayong lakat sa panahon nga naggsugod sa Fuente Osmeña lahus ngadto sa Basilica Miñore del Sto. Niño nga gitak-opan sa usa ka Santos nga misa nga gipahigayon ni Palma uban sa mga obispo ug kaparian sa Archdiocese of Cebu. (BANAT NEWS)